ކްލަބް ތަކަށް އަމާޒުކޮށްގެން، ދުނިޔޭގެ ފުޓްބޯޅައިގެ މައި އިދާރާ، ފީފާއިން ކުރިއަށް ގެންދާ ކްލަބް ވޯލްޑް ކަޕްގައި ބައިވެރިކުރާ ޓީމު ތަކުގެ އަދަދު 32 އަށް އިތުރުކޮށް، އެ މުބާރާތް 2025 ވަނަ އަހަރު ބާއްވާގޮތަށް ފާސްކޮށްފިއެވެ.
މާނައަކީ މި ބަދަލާއެކު މިހާރު 7 ޓީމު ވާދަކުރާ ކްލަބް ވޯލްޑް ކަޕް ހަތަރު ގުނައަށްވުރެ ބޮޑުވެގެންދާނެއެވެ. މިކަން އިއުލާނުކުރެއްވީ މިހާރު ގަތަރުގައި ކުރިއަށްދާ ވޯލްޑް ކަޕްގެ ބައްދަލުވުން ތަކުގެ ތެރޭން، ފީފާގެ ރައީސް ޖިއަނީ އިންފަންޓީނޯއެވެ.
ދުނިޔޭގެ ފުޓްބޯޅައިގެ މައި އިދާރާއިން ކުރިންވެސް ވަނީ، މުބާރާތުގައި ބައިވެރިވާ ޓީމުތަކުގެ އަދަދު އިތުރުކުރަން ނިންމައިފައެވެ. އޭރު ނިންމާފައިވަނީ، ޗައިނާގައި 2021 ވަނަ އަހަރު ބޭއްވުމަށް ހަމަޖެހުނު މުބާރާތުގައި 24 ޓީމަށް ފުރުސަތު ދިނުމަށެވެ. ނަމަވެސް، ކޮވިޑް19ގެ ސަބަބުން އެ މުބާރާތް ނުބޭއްވި ލަސްވީއެވެ.
އަލަށް ގެނައި ބަދަލާއެކު ކްލަބް ވޯލްޑް ކަޕްވެސް ދެން އޮންނާނީ، ކޮންމެ ހަތަރު އަހަރަކުން އެއް އަހަރެވެ.
މީގެ 22 އަހަރު ކުރީން ބާއްވާން ފެށި ކްލަބް ވޯލްޑް ކަޕްގެ އެންމެ ފަހުގެ ޗެމްޕިއަނުންނަކީ، އިނގިރޭސި ކްލަބް ޗެލްސީއެވެ.
ކްލަބް ވޯލްޑް ކަޕް މިހާތަނަށް އެންމެ ގިނައިން ކާމިޔާބުކޮށްފައި ވަނީ، ސްޕެއިންގެ ރެއާލް މެޑްރިޑުންނެވެ. އެއީ ހަތަރު ފަހަރެވެ. ދެން ބާސެލޯނާއިން 3 ފަހަރު، ބްރެޒިލްގެ ކޮރިންތިއާންސް އަދި ޖަރުމަނުގެ ބަޔާން މިއުނިކް ކޮންމެ ޓީމެއް 2 ފަހަރު، އަދި ޗެލްސީ، ލިވަޕޫލް، މަންޗެސްޓަރ ޔުނައިޓެޑް، ސައޮޕޯލޯ، އިންޓަނޭސިއޯނަލް، އިންޓަނޭސިއޯނަލޭ، މިލާން މިއިން ކޮންމެ ޓީމެއ1 ފަހަރުއެވެ.
