އަވައްޓެރި އިންޑިއާގައި އަނެއްކާވެސް ހަލުއިކަމާއެކު، ކޮވިޑް19 ފެތުރޭން ފަށާފައިވާއިރު، މި ބައްޔާގުޅޭގޮތުން، ރައްކާތެރިކަމުގެ ފިޔަވަޅުތައް އިތުރުކުރުމަށާއި، ކަމާގުޅޭ ގޮތުން ސައްހަ މައުލޫމާތު ފެތުރުމަށް އިންޑިއާ ސަރުކާރުން އިލްތިމާސްކޮށްފިއެވެ.
އިންޑިއާގެ ޔޫނިއަން ހެލްތު މިނިސްޓަރ މުންސުކް މަންޑަވިޔާ، ހޯމަދުވަހު ވަނީ އިންޑިއަން މެޑިކަލް އެސޯސިއޭޝަން (އީމާ)ގެ 100އަށް ވުރެ ގިނަ ޑޮކްޓަރުންނާ ބައްދަލުކުރައްވައި، އާންމު ރައްޔިތުންނަށް ކޮވިޑާ ގުޅޭ ވީހާވެސް ސައްހަ މައުލޫމާތު ހިއްސާކުރުމާއި، މި ބަލިން ރައްކާތެރިވުމުގެ ގޮތުން ރައްޔިތުން ހޭލުންތެރިކުރުވުމަށް އިލްތިމާސްކުރައްވައިފައެވެ.
އޭނާ ވިދާޅުވީ، އިންޑިއާގެ އިތުރުން ދުނިޔޭގެ އެކި ކަންކޮޅުތަކުގައިވެސް ކޮވިޑް19ގެ ކޭސްތައް އަނެއްކާވެސް އިތުރުވާން ފަށާފައިވާއިރު، މިކަމުގެ މައުލޫމާތުތަކާއި، ރައްކާތެރިވުމުގެ އިރުޝާދުތައް ދިނުމުގައި ތޯތޯ ވާހަކަ ދެއްކުމުގެ ބަދަލުގައި ރައްޔިތުންނަށް އެންމެ ސައްހަ މައުލޫމާތު ދިނުން މުހިއްމު ކަމަށެވެ. އަދި އިންޑިއާގެ ސްޓޭޓްތަކުގައި ކޮވިޑުން ރައްކާތެރިވުމުގެ ޑްރިލްތައް ކުރިއަށް ގެންދިއުމަށާއި، ރައްޔިތުންވެސް މައުލޫމާތު ހިއްސާކުރާއިރު، ސައްހަނޫން މައުލޫމާތު ނުފެތުރުމަށް ވަނީ އިލްތިމާސްކޮށްފައެވެ.
އިންޑިއާގެ އިތުރުން ޗައިނާގައިވެސް ދަނީ ކޮވިޑް19 ވަރަށް ހަލުއިކަމާއެކު ފެތުރެމުންނެވެ.
