ކުރީގެ ރައީސުލްޖުމްހޫރިއްޔާ އަބްދުﷲ ޔާމީންގެ މައްޗަށް، ވ. އާރަށް ކުއްޔަށް ދިން މައްސަލައިގައި ދައުލަތުން ކުރި ރިޝްވަތުގެ ދައުވާއާއި މަނީލޯންޑްރިންގެ ދައުވާ އެމަނިކުފާނުގެ މައްޗަށް ސާބިތުވާ ކަމަށް ކްރިމިނަލް ކޯޓުން މިއަދު ނިންމައިފިއެވެ.
އާރަށް ކުއްޔަށް ދީގެން، ރިޝްވަތުގެ ގޮތުގައި އެއް މިލިއަން ޑޮލަރު ހޯއްދަވައި، އެ ފައިސާ ލޯންޑަރކުރެއްވި ކަމަށް ރައީސް ޔާމީންގެ މައްޗަށް މިއަދު ކޯޓުން ނިންމެވިއިރު، އެމައްސަލައިގައި ދައުލަތުން އެދިފައި ވަނީ، ރައީސް ޔާމީނަށް 19 އަހަރުގެ ޖަލުހުކުމެއް އިއްވައިދިނުމަށެވެ. އެއީ އެއީ ރިޝްވަތުގެ ކުށަށް 8 އަހަރު އަދި މަނީ ލޯންޑްރިންގެ ކުށަށް 11 އަހަރެވެ.
މީގެ އިތުރުން ރައްޔިތުންގެ މަޖިލީހުގެ ކުރީގެ މެމްބަރު ޔޫސުފް ނަޢީމްގެ މައްޗަށް ވަނީ، ރިޝްވަތު ދިނުމުގެ ކުށް ސާބިތުކޮށްފައެވެ. އަދި ދައުލަތުން އެދިފައިވަނީ، އޭނާއަށް ވެސް 8 އަހަރުގެ ޖަލުހުކުމެއް އިއްވުމަށެވެ.
ރައީސް ޔާމީނުގެ މައްޗަށް ސާބިތުކޮށްފައިވަނީ، "ޙަރާމް ޙުކުމެއް" ކަމަށް ބުނެ އިދިކޮޅު ފަރާތްތަކުން ދަނީ ވެރިރަށް މާލެ ސިޓީގައި އިހްތިޖާޖުކުރަމުންނެވެ.
