ކުރީގެ ރައީސުލްޖުމްހޫރިއްޔާ އަބްދުﷲ ޔާމީންގެ މައްޗަށް، ކުރަނީ ސިޔާސީ ދައުވާއެއްކަމަށާއި، އަދި އެމަނިކުފާނުގެ މައްޗަށް އިއްވާ ސިޔާސީ ހުކުމް ގަބޫލު ނުކުރާ ކަމަށް ބުނެ، ސަރުކާރާ އިދިކޮޅު ފަރާތްތަކުން ވެރިރަށް މާލެ ސިޓީގެ މަގުތަކަށް ނުކުމެ އިހްތިޖާޖުކުރާން ފަށައިފިއެވެ.
ވ. އާރަށް ކުއްޔަށް ދިން މައްސަލައިގައި ރައީސް ޔާމީންގެ މައްޗަށް ދައުލަތުން ކުރި ރިޝްވަތުގެ ދައުވާއާއި މަނީލޯންޑްރިންގެ ދައުވާ އެމަނިކުފާނުގެ މައްޗަށް ސާބިތުވާ ކަމަށް މިއަދު ކްރިމިނަލް ކޯޓުން ވަނީ ނިންމައިފައެވެ. އަދި އެމަނިކުފާނުގެ މައްޗަށް 19 އަހަރުގެ ޖަލުހުކުމެއް އިއްވައިދިނުމަށް ދައުލަތުން ވަނީ ކޯޓުގައި އެދިފައެވެ.
ރައީސް ޔާމީންގެ މައްޗަށް ސާބިތުވީކަމަށް މިއަދު ކޯޓުން ނިންމީ، އާރަށް ކުއްޔަށް ދީގެން، ރިޝްވަތުގެ ގޮތުގައި އެއް މިލިއަން ޑޮލަރު ހޯއްދަވައި، އެ ފައިސާ ލޯންޑަރކުރެއްވި ކަމަށެވެ. އެމައްސަލައިގައި ދައުލަތުން އެދިފައި ވަނީ، ރިޝްވަތުގެ ކުށަށް 8 އަހަރު އަދި މަނީ ލޯންޑްރިންގެ ކުށަށް 11 އަހަރަށް ޔާމީން ޖަލަށް ލައިދިނުމަށެވެ.
އިދިކޮޅު ފަރާތްތަކުން މާލޭގައި އިހްތިޖާޖުކުރަމުން ދަނީ ރައީސް ޔާމީނުގެ މައްޗަށް ސާބިތުކޮށްފައިވަނީ، "ޙަރާމް ޙުކުމެއް" ކަމަށް ބުނެއެވެ.
