ކުރީގެ ރައީސުލްޖުމްހޫރިއްޔާ އަދި މިހާރުގެ އިދިކޮޅު ލީޑަރު، ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް، ރިޝްވަތާއި މަނީ ލޯންޑަރިންގެ ކުށް ސާބިތުވެއްޖެ ކަމަށް ކަނޑައަޅައި، އެމަނިކުފާނު 11 އަހަރަށް ޖަލަށް ލުމަށާއި،5 މިލިއަން އެމެރިކާ ޑޮލަރުން ޖޫރިމަނާކުރަން މިއަދު ރާއްޖޭގެ ކްރިމިނަލް ކޯޓުން ޙުކުމްކޮށްފިއެވެ.
ވ. އާރަށް ކުށްޔަށް ދިނުމުގައި ރިޝްވަތާއި މަނީ ލޯންޑަރިންގ ހިމެނޭކަމަށް ބުނެ، ރައީސް ޔާމީނާ ދެކޮޅަށް ދައުލަތުން އުފުލި ދައުވާ ސާބިތުވާކަމަށް ވިދާޅުވެ، ކްރިމިނަލް ކޯޓުގެ އިސް ޤާޞީ، އަޙްމަދު ޝަކީލު މިއަދު އިއްވި ހުކުމުގައި ވިދާޅުވީ، ރައީސުލްޖުމްހޫރިއްޔާ ކަމުގައި ހުންނަވައި ރިޝްވަތު ގަބޫލުކުރުމުގެ މައްސަލައިގައި 4 އަހަރުގެ ޙުކުމެއް، އަދި މަނީ ލޯންޑަރިން މައްސަލައިގައި 7 އަހަރުގެ ޙުކުމެއް އިއްވާ ކަމަށާއި، އަދި ޖަލުހުކުމުގެ އިތުރުން، ފަސް މިލިއަން އެމެރިކާ ޑޮލަރުން ރައީސް ޔާމީން ޖޫރިމަނާކޮށް އެފައިސާ 6 މަސްދުވަހުގެ ތެރޭގައި މީރާއަށް ދެއްކުމަށް އަމުރުކުރާ ކަމަށެވެ.
އާރަށް ކުއްޔަށް ދީގެން، ރިޝްވަތުގެ ގޮތުގައި އެއް މިލިއަން ޑޮލަރު ހޯއްދަވައި، އެ ފައިސާ ލޯންޑަރކުރެއްވި ކަމަށް ރައީސް ޔާމީންގެ މައްޗަށް މިއަދު ކޯޓުން ނިންމެވިއިރު، އެމައްސަލައިގައި ދައުލަތުން އެދިފައި ވަނީ، ރައީސް ޔާމީނަށް 19 އަހަރުގެ ޖަލުހުކުމެއް އިއްވައިދިނުމަށެވެ. އެއީ އެއީ ރިޝްވަތުގެ ކުށަށް 8 އަހަރު އަދި މަނީ ލޯންޑްރިންގެ ކުށަށް 11 އަހަރެވެ.
