ރާއްޖެއަށް އިރުއަރައި އޮއްސޭ ކޮންމެ ދުވަހަކީ ވެސް ދިވެހިންގެ އެއްބައިވަންތަކަމުގެ ދުވަހެއް ކަމަށާއި އެކަން އެގޮތުގައި ތާއަބަދުމެ ދަމަހައްޓާން މަސައްކަތްކުރާން ޖެހޭ ކަމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
މީގެ 18 އަހަރު ކުރިން، 2004 ވަނަ އަހަރުގެ ޑިސެންބަރު މަހުގެ 26 ވަނަ ދުވަހު، މުޅި ރާއްޖެއަށް ކުރިމަތިވި ސުނާމީ ކާރިސާއާ ގުޅިގެން އޭގެ ފަހުން ކޮންމެ އަހަރަކު ގައުމީ ފެންވަރުގައި ފާހަގަކުރަމުން އަންނަ، ދިވެހިންގެ އެއްބައިވަންތަކަމުގެ ދުވަހުގެ މިއަހަރުގެ ޖަލްސާގައި، މ. ކޮޅުފުށީގައި ވާހަކަފުޅުދައްކަވަމުން ރައީސް ވިދާޅުވީ، ސިޔާސީ ބޭނުމަކަށްޓަކައި ގައުމުގެ ސުލްހަޔާ އެއްބައިވަންތަކަން ނަގައިލާން މަސައްކަތް ނުކުރުމަށް އެދިވަޑައިގަންނަވާ ކަމަށެވެ.
"ދިވެހިންގެ އެއްބައިވަންކަމުގެ ދުވަސް އަޅުގަނޑުމެން މި ފާހަގަކުރަނީ، ކުރިންވެސް ދެންނެވި ފަދައިން، ސުނާމީ ކާރިސާގެ ދުވަހާ ގުޅުވައިގެން. ނަމަވެސް، އަޅުގަނޑު ދެކޭގޮތުގައި، ރާއްޖެއަށް އިރުއަރައި އޮއްސޭ ކޮންމެ ދުވަހަކީ، ދިވެހިންގެ އެއްބައިވަންތަކަމުގެ ދުވަހެއް. އެއްބައިވަންތަކަމަށް ބޭނުންވާ ދުވަހެއް. އެއްބައިވަންތަކަން ދަމަހައްޓަން މަސައްކަތް ކުރަންޖެހޭވެސް ދުވަހެއް" ރައީސް ވިދާޅުވިއެވެ.
އެމަނިކުފާނު ވިދާޅުވީ، "އަޅުގަނޑު ދިވެހި ރައްޔިތުންނަށް ޚިދުމަތް ކުރުމަށް، މި މަޤާމުގައި މިހާތަނަށް މި ހޭދަކުރި 1501 ދުވަހުގެ ތެރެއިން ކޮންމެ ދުވަހަކީ، ދިވެހި ރައްޔިތުންގެ އެއްބައިވަންތަކަން ދެމެހެއްޓުމަށް މަސައްކަތްކުރި ދުވަހެއް." ކަމަށެވެ.
ރައްޔިތުންނަށް ޚިދުމަތް ކުރަން ނުކުތްއިރު، އެމަނިކުފާނުގެ ކުރިމަތީގައި އޮތް އެންމެ ބޮޑު އެއް ކަމަކީ، "އަޅުގަނޑުމެންގެ ތެރެއިން ހަމަޖެހުމާއި ޞުލްޙަޔާއި އެއްބައިވަންތަކަން ގެއްލި، ބައިބައިވެފައި އޮތް އޮތުން. ސިޔާސީ ބޭނުންތަކަށްޓަކައި ވަކި ބަޔަކު ގަސްދުގައި ދިޔައީ ހަމަޖެހުން ނަގައިލަމުން" ކަމަށެވެ.
މިއީ ފަހަރެއްގައި އެމަނިކުފާނު ނިސްބަތްވާ ސިޔާސީ ޕާޓީ، އެމްޑީޕީގެ ތެރޭގައި، އެމަނިކުފާނު ވެރިކަމަށް ވަޑައިގަތްފަހުން ފެށިގެންއައި، ވެރިކަމުގެ ބާރުހޯދުމަށް އުފެދުނު ދެފެކްޝަނުގެ ދެމެދުގައި އޮތް ސިޔާސީ ހަލަބޮލިކަމަށް އިޝާރާތްކުރައްވައި ވިދާޅުވި ވާހަކަފުޅަކަށްވެސް ވެދާނެއެވެ.
