ދުނިޔޭގައި މިހާތަނަށް އުފެދުނު އެންމެ މޮޅު ފުޓްބޯޅަ ކުޅުންތެރީންގެ ތެރޭންވެސް، ފުޓްބޯޅައިގެ ރަސްގެފާނުގެ ނަމުން މަޝްހޫރުވެފައިވާ، ބްރެޒިލްގެ ކުރީގެ ތަރި ޕެލޭ މަރުވެއްޖެއެވެ.
ޒަމާނީ ފުޓްބޯޅައިގެ ބައްޕަގެ ނަމުން މަޝްހޫރުވެފައިވާ، މިހާރު އުމުރުން 82 އަހަރުގެ ޕެލޭ މަރުވީ، ކެންސަރަށް ފަރުވާ ހޯދަމުން ދަނިކޮށް، ބްރެޒިލްގެ ސައޮޕޯލޯގައި ހުންނަ އިސްރައެލީޓާ އަލްބަރޓް އެއިންސްޓެން ހޮސްޕިޓަލުގައެވެ.
ދުނިޔޭގެ ފުޓްބޯޅަ ތަށި މިހާތަނަށް ތިން ފަހަރު އުފުލައިލުމުގެ ޝަރަފް ހޯދި ހަމަ އެކަނި ކުޅުންތެރިޔާކަމަށްވާ ޕެލޭއަކީ، ދުނިޔޭގެ އެކި ކަންކޮޅުތަކުގައި ޒަމާނީ ފުޓްބޯޅަ ކުރިއެރުވުމަށް އެތައް މަސައްކަތްތަކެއް ކޮށްފައިވާ، އަދި، ފުޓްބޯޅައިގެ އާހުނަރުތައް ތައާރަފްކޮށް، ގިނަބައެއްގެ ލޯބި ހޯދައިފައިވާ ޝަހްޞިއްޔަތެކެވެ.
ޕެލޭ މަރުވުމާ ގުޅިގެން، ފުނިޔޭގެ އެކި ކަންކޮޅުތަކުގައި ފުޓްބޯޅަ އާއިލާތަކާއި ފުޓްބޯޅައަށް ލޯބިކުރާ ފަރާތްތަކުން ދަނީ، ހިތާމަފާޅުކޮށް، ޕެލޭގެ ހަނދާންތައް އާކުރަމުންނެވެ.
