މިދިޔަ އަހަރުގެ ޑިސެމްބަރު 28 ވަނަ ދުވަހުގެ ރޭ މާލެ އަތޮޅު ވިލިމާލެއިން ތެޔޮ ބޯޓެއްގައިފުރި ދެ މީހެއްގެ ޚަބަރެއް ނުވެގެން އެމީހުން ހޯދުމުގެ މަސައްކަތް ފުލުހުންވަނީ ހާމަކޮށްފައެވެ. އަދި އެމީހުން ދަތުރުކުރި ތެޔޮބޯޓު، ވެލާނާ އިންޓަރ ނޭޝަނަލް އެއަރޕޯޓު އޮންނާ ހުޅުލޭގެ ނެރުކައިރިން އޮޔާ ދަނިކޮށް، އޭގެ އެއްދުވަސް ފަހުން ފެނިފައިވާ ކަމަށްވެސް ފުލުހުން ވަނީ ހާމަކޮށްފައެވެ.
ނަމަވެސް ފުލުހުން ބުނީ، ބޯޓުން ގެއްލުނު 2 މީހުންގެ ޚަބަރެއް އެަދިވެސް ނުވާ ކަމަށާއި އެމީހުން ހޯދުމުގެ މަސައްކަތް، މުޅި މާލެ ސަރަހައްދު ހިމެނޭގޮތަށް ކުރަމުން އަންނަ ކަމަށެވެ.
ގެއްލިފައި ވަނީ، ގދ. ތިނަދޫ / މަނާރު، މުޙައްމަދު ނިޡާމް (45އ) އަދި ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ) އެވެ.
ގެއްލިގެން ހޯދަމުންއަންނަ މި 2 މީހުންނާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ 9911099 އަށް ގުޅުއްވައި ހިއްސާކުރެއްވުމަށް ފުލުހުން ވަނީ އެދިފައެވެ.
