ޑިސެމްބަރު 28 ވަނަ ދުވަހުގެ ރޭ މާލެ އަތޮޅު ވިލިމާލެއިން ތެޔޮ ބޯޓެއްގައިފުރި ދެ މީހެއްގެ ޚަބަރެއް ނުވެގެން އެމީހުން ހޯދުމުގެ މަސައްކަތް ފުލުހުންވަނީ ހާމަކޮށްފައެވެ. އެމީހުން ދަތުރުކުރި ތެޔޮބޯޓު، ހުޅުލޭގެ ނެރުކައިރިން އޮޔާ ދަނިކޮށް، ފެނިފައިވާ ކަމަށާއި 2 މީހުން ނުފެންނަކަމަށް ފުލުހުން ބުނެއެވެ.
ނަމަވެސް މިއަދު، އިބްރާހިމް މުހައްމަދު ނަމަކަށް ކިޔާ މީހަކު (@ibrahimjanab) އޭނާގެ ޓްވިޓަރ އެކައުންޓުގައި ލިޔެފައިވަނީ، ގެއްލުނު ދެމީހުންގެ ތެރޭން ގދ. ތިނަދޫ / މަނާރު، މުޙައްމަދު ނިޡާމް (45އ) މިއަދު، މާލޭ މަގުމަތިން ދިމާވެގެން އޭނާއާ ވާހަކަ ދެއްކި ކަމަށެވެ. އަދި ނިޡާމް ގާތު ގެއްލިގެން އުޅޭ ވާހަކަ އެހުމުން، އޭނާ އެއައީ ފުލުހުންގެ މަރުކަޒަށް ގޮސްފައި ކަމަށާއި، އޭނާ ގެއްލިގެން ހޯދުމުގެ މަސައްކަތް ކުރަމުން ނުދާކަމަށް ފުލުހުން ބުނިކަމަށް ނިޡާމު ބުނި ކަމަށެވެ.
"ތި ގެއްލިގެން ހޯދާ މީހާ ގްރީން ޒޯނުން ފެނިގެން ދެންމެ މި ފޮޓޯ ނެގީ. އަހާލީމަ ބުނީ "ފުލުހުން ބުންޏާ ގެއްލިގެން ނޫޅެމޭ"؟؟ އޭނާ ހުރީ މާލޭގަ..ދެން؟" އިބްރާހީމްޖަނާބް
މިކަމާ ގުޅޭގޮތުން ފުލުހުންގެ ބަހެއް އަދި ނުލިބެއެވެ.
ފުލުހުން ވަނީ، ގެއްލިގެން ހޯދަމުންދާ ގދ. ތިނަދޫ / މަނާރު، މުޙައްމަދު ނިޡާމް (45އ) އަދި ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ)އާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓުގެ 9911099 އަށް ގުޅުއްވައި ހިއްސާކުރެއްވުމަށް ފުލުހުން ވަނީ އެދިފައެވެ.
