މެޗުތައް ކުޅޭ ދަނޑުތަކުގައި ރާވިއްކުން މަނާކުރުން މައްސަލައަކަށްވީ، މުސްލިމު ގައުމަކުން އެގޮތަށް ނިންމުމުންތޯ ސުވާލުއުފައްދައި، ފީފާގެ ރައީސް ޖިއަނީ އިންފަންޓީނޯ، އެކަމަށް ވަރަށް ބޮޑަށް ފާޑުވިދާޅުވެއްޖެއެވެ.
މިއަހަރުގެ ވޯލްޑް ކަޕް މެޗުތައް ކުޅޭ ދަނޑުތަކުގައި ރާވިއްކުން މަނާކުރުމުން، ހުޅަނގުގެ ގިނަ ބައެއްގެ ފާޑުކިޔުން ޤަތަރަށް އަމާޒުވުމުން އެކަމަށް ވަރަށް ބޮޑަށް ފާޑުވިދާޅުވެ، ފުޓްބޯޅައިގެ މައި އިދާރާގެ ރައީސް ވިދާޅުވީ، "އަހަންނަށް ހީވަނީ، ރާ ނުބޮއި 3 ގަޑިއެއްހާއިރު ތިބި ކަމުގައިވީ ނަމަވެސް، ދިރިހުންނާނޭކަމަށް ގަބޫލުކުރެވޭ" ކަމަށެވެ.
އަދި، މެޗުކުޅޭ ދަނޑުތަކުގައި ރާވިއްކުން މަނާ އެތަކެއް ގައުމުތަކެއް އޮތްކަމަށެވެ. އެގޮތުން، ފްރާންސްގެ ދަނޑުތަކުގައިވެސް ރާ ހުއްދަ ނޫންކަމަށާއި، ނަމަވެސް، މިހާރު މިކަން މައްސަލައަކަށް މިވީ، މުސްލިމު ގައުމަކުން މިގޮތަށް ނިންމުމުން ކަމަށެވެ.
