ޑިސެމްބަރު 28 ވަނަ ދުވަހުގެ ރޭ މާލެ އަތޮޅު ވިލިމާލެއިން ތެޔޮ ބޯޓެއްގައިފުރި ދެ މީހެއްގެ ޚަބަރެއް ނުވެގެން އެމީހުން ހޯދުމުގެ މަސައްކަތް ކުރަމުން ދަނިކޮށް، އޭގެ ތެރޭން އެކަކު މާލެތެރޭގައި އެނބުރެނިކޮށް އާންމުންގެ މީހަކަށް ފެނިގެން ފޮޓޯ ނަގައި ސޯޝަލް މީޑިއާގައި ހާމަކުރި ފަހުން، އޭނާ މާލޭގެ ގެސްޓުހައުސް އެއްގެ ތެރޭން ފެނިފައިވާ ކަމަށް ފުލުހުން ވަނީ ހާމަކޮށްފައެވެ.
ގެއްލިގެން ހޯދަމުންދާ ގދ. ތިނަދޫ / މަނާރު، މުޙައްމަދު ނިޡާމް (45އ) އަދި ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ)އެވެ. ގެސްޓްހައުސް ތެރޭން ފެނިފައިވާ ކަމަށް ފުލުހުން ހާމަކޮށްފައިވާ މީހަކީ ނިޡާމެވެ.
މިކަމާ ގުޅޭގޮތުން މީޑިއާތަކުން ފުލުހުންނާ ސުވާލުކުރުމުން، ފަހުން، މި ބުނާ ނިޡާމް، މަރުގެ މައްސަލައެއްގައި ހައްޔަރުކޮށްފައިވާ ކަމަށް ފުލުހުން ވަނީ މައުލޫމާތުދީފައެވެ.
އިބްރާހިމް މުހައްމަދު ނަމަކަށް ކިޔާ މީހަކު (@ibrahimjanab) އޭނާގެ ޓްވިޓަރ އެކައުންޓުގައި، ގދ. ތިނަދޫ / މަނާރު، މުޙައްމަދު ނިޡާމް (45އ) އާ މަގުމަތިން ދިމާވި ކަމަށާއި، ނިޡާމް ގާތު ގެއްލިގެން އުޅޭ ވާހަކަ އެހުމުން، އޭނާ އެއައީ ފުލުހުންގެ މަރުކަޒަށް ގޮސްފައި ކަމަށާއި، އޭނާ ގެއްލިގެން ހޯދުމުގެ މަސައްކަތް ކުރަމުން ނުދާކަމަށް ފުލުހުން ބުނިކަމަށް ލިޔެފައިވެއެވެ.
އެނގިފައިވާ ގޮތުގައި، ނިޡާމާއެކު، ގެއްލުނު ބަނގުލަދޭޝް މީހާ އަދިވެސް ނުފެނެއެވެ. ނަމަވެސް، ކާކުކަން ނޭނގޭ މީހެއްގެ ހަށިގަނޑު އިއްޔެ ހެނދުނު ވ. އަތޮޅު ވެންޕަރު ނަމަކަށް ކިޔާ ފަޅުރަށެއް ކައިރިން ވަނީ ފެނިފައެވެ.
