މާލެ ސިޓީގެ ރަސްމީ ފާލަމާއި 3 ނަންބަރު ޖެޓީއާ ދެމެދު ގިނަ އަދަދެއްގެ ކަޅުތެޔޮ އެޅިފަ ހުރިކަމުގެ މަޢުލޫމާތު ލިބިގެން އާދީއްތަ ދުވަހުން ފެށިގެން މޯލްޑިވްސް ނޭޝަނަލް ޑިފެންސް ފޯސްއިން ހަރަކާތްތެރިވަމުންދާކަމަށް އެމްއެންޑީއެފުން މީގެ ކުރީން ވަނީ ބުނެފައެވެ. އަދި ތެޔޮނެގުމުގެ މަސައްކަތް ނިންމާލެވިއްޖެ ކަމަށްވެސް މިހާރު ވަނީ ބުނެފައެވެ.
އެމްއެންޑީއެފުން ބުނީ، އެމްއެންޑީއެފް ކޯސްޓްގާޑް އޮއިލް ރެސްޕޮންސް ޓީމާއި މާލެ އޭރިއާ ސިފައިން ގުޅިގެން ރަސްމީ ފާލަމާ ދިމާލު ފަޅުތެރެއަށް އެޅިފައިވާ ކަޅު ތެޔޮ މިއަދު މެންދުރު 13:35 ހާއިރު ވަނީ އެސަރަހައްދުން ނަގައި ނިންމާފައި ކަމަށެވެ. އަދި މިހާތަނަށް 15 ބެރަލްގެ ތެޔޮ ނަގާފައިވާ ކަމަށްވެސް ވަނީ ބުނެފައެވެ.
