ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރީންގެ ތެރޭގައި ހިމެނޭ، ޕޯޗްގީޒް ތަރި، ކްރިސްޓިއާނޯ ރޮނާލްޑޯ، ޔޫރަޕްގެ ކާމިޔާބީއަށް ފަހު، އޭޝިއާގެ ދަތުރު ފަށައިފިއެވެ.
މެންޗެސްޓަރ ޔުނައިޓެޑާއެކު ރޮނާލްޑޯ ހަދާފައިވާ އެއްބަސްވުން، މިދިޔަ އަހަރު ހަމަވުމާ ގުޅިގެން އޭނާ ވަނީ މިދިޔަ ހަފްތާގައި، ސައުދީ އަރަބިޔާގެ އަލް ނަސްރު ފުޓްބޯޅަ ކްލަބަށް ސޮއިކޮށްފައެވެ.
އަލް ނަސްރު ޓީމާ ގުޅުމަށް ފަހު ރޮނާލްޑޯ ބޭއްވި ފުރަތަމަ ރަސްމީ ނޫސްވެރިންގެ ބައްދަލުވުމުގައި އޭނާ ބުނީ، އޭނާއަށް ޔޫރަޕްގައި މިހާރު ހުރިހާ ކާމިޔާބީއެއް ހޯދިއްޖެ ކަަމަށެވެ. އަދި މިހާރު ބޭނުންވަނީ، އާ ޗެލެންޖަކާ ކުރިމަތިލުމަށް ކަމަށާއި، އޭނާގެ މުސްތަގުބަލް އޮތީ، އޭޝިއާގެ ފުޓްބޯޅަ ކުރިއަރުވައި، ތަރައްގީކުރުމަށް ކަމަށެވެ.
"ޔޫރަޕްގައި އަހަރެންގެ މަސައްކަތް ނިމުނީ!" އޭނާ ބުންޏެވެ. "އަހަރެން ހުރިހާ އެއްޗެއް ކާމިޔާބުކުރިން. އަހަރެން ވާނީ، ޔޫރަޕްގެ އެންމެ މުހިއްމު ކްލަބްތަކަށް ކުޅެފައި. މިހާރު އަހަރެން މިވަނީ އާ ޗެލެންޖަކާ ކުރިމަތިލާފައި."
މެންޗެސްޓަރ ޔުނައިޓެޑްގެ އިތުރުން، ރެއާލް މެޑްރިޑް، އޭސީ މިލާން ފަދަ ބޮޑެތި ކްލަބްތަކަށް ކުޅެފައިވާ، ހުނަރުވެރި ކުޅުންތެރިޔާ އިތުރަށް ބުނީ، އޭޝިއާގައި ކުޅެން ނިންމި ނިންމުމާމެދު އޭނާ ފަޚުރުވެރިވާ ކަމަށެވެ.
