ސައުދީ ޢަރަބިއްޔާގެ އަލް ނަސްރު ފުޓްބޯޅަ ކްލަބާ މިދިޔަ ހަފްތާގައި ގުޅުނު ޕޯޗްގީޒް ތަރި ކްރިސްޓިއާނޯ ރޮނާލްޑޯއަށް ޔޫރަޕްގެ އެންމެ ޝަރަފްވެރި އެއް ފުޓްބޯޅަ މުބާރާތް ކަމަށްވާ ޗެމްޕިއަންސް ލީގުގައި ކުޅުމުގެ ފުރުސަތު އަދިވެސް އެބަ އޮތެވެ.
ޗެމްޕިއަންސް ލީގުގައި ގިނަ ރެކޯޑްތަކެއް ހަދައި، އެންމެ ކާމިޔާބު އެއް ކުޅުންތެރިޔާގެ ލަގަބް ހޯދާފައިވާ ކްރިސްޓިއާނޯ ރޮނާލްޑޯ، އަލް ނަސްރު ޓީމާއެކު ވެފައިވާ އެއްބަސްވުމުގައިވާގޮތުން، އިނގިރޭސި ކްލަބް ނިއުކާސަލް ޔުނައިޓެޑް ޗެމްޕިއަންސް ލީގުގައި ކުޅޭނަމަ، ލޯނު އުސޫލުން ރޮނާލްޑޯއަށް އެ ކްލަބަށް ދިއުމުގެ ފުރުސަތު އެބައޮތެވެ. އަލް ނަސްރު ޓީމުފަދައިން، ނިއުކާސަލަކީ، ސައުދީ އަރަބިއަން ޕަބްލިކް އިންވެސްޓްމަންޓް ފަންޑަށް ނިސްބަތްވާ ކްލަބެކެވެ.
ރޮނާލްޑޯއަކީ، ޗެމްޕިއަންސް ލީގުގައި މިހާތަނަށް އެންމެ ގިނަ ލަނޑު (140) ޖެހި ކުޅުންތެރިޔާއެވެ. އޭނާގެ އެ ރެކޯޑާ އެންމެ ގާތްކުރަނީ، އާޖެންޓީނާގެ ތަރި، އަދި މިހާރު ދުނިޔޭގައި ހުރި އެންމެ މޮޅު ފުޓްބޯޅަ ކުޅުންތެރިޔާ ލިއޮނަލް މެސީއެވެ. ފްރާންސްގެ ޕީއެސްޖީއަށް ކުޅެމުން އަންނަ މެސީއަށް، ޗެމްޕިއަންސް ލީގުގައި 11 ލަނޑު ޖަހައިގެން، ރޮނާލްޑޯގެ ލަނޑުގެ ރެކޯޑް މުގުރާލުމުގެ ފުރުސަތު އެބަ އޮތެވެ. އެހެންކަމުން، ނިއުކާސަލް ޗެމްޕިއަންސް ލީގަށް ކޮލިފައި ވުމަކީ ރޮނާލްޑޯއަށް ވަރަށް މުހިއްމު ވާނޭ ކަމެކެވެ.
