ޓެންޒޭނިޔާގައި މީގެ 6 އަހަރު ކުރީން، އެގައުމުގެ އޭރުގެ ރައީސް ޖޯން މަޣްފޫލީ ވަނީ އާންމު ތަންތާނގައި ސިޔާސީ އެއްވުންތައް ބޭއްވުން މަނާކޮށްފައެވެ. ނަމަވެސް، މިހާރުގެ ރައީސް ސާމިއާ ސުލޫހު ހަސަން ވަނީ، ސިޔާސީ އެއްވުންތައް ހުއްދަކުރައްވައިފައިވާ ކަން އިއުލާނުކުރައްވައިފައެވެ.
ޓެންޒޭނިއާގެ ފުރަތަމަ އަންހެން ރައީސް، ސާމިއާ ދަނީ އެގައުމަށް، ސިޔާސީގޮތުން ބޮޑެތި އިސްލާހުތަކެއް ގެނެސްދެއްވަމުންނެވެ. އެގޮތުން، އަލަށް އެކުލަވައިލި އުސޫލުތަކުގެ ތެރޭން، އިންތިޚާބުވެފައިވާ ސިޔާސީ ލީޑަރުންނަށް، އޭނާ އިންތިޚާބުވެފައިވާ ސަރަހައްދު ތަކުގައި ސިޔާސީ ހަރަކާތްތަށް ކުރިއަށް ގެންދެވޭނެއެވެ. ނަމަވެސް، އެހެން ސަރަހައްދު ތަކުގައި އަދިވެސް އެފަދަ ރެލީތައް ބޭއްވުން މަނާވާނެއެވެ.
މިދިޔަ އަހަރު، ސާމިއާ ވަނީ ނޫސްވެރިކަމުގެ މިނިވަންކަން ކަށަވަރުކޮށްދިނުމުގެ ގޮތުން، ކުރީގެ ސަރުކާރުން އެގައުމުގައި ނެރުން މަނާކޮށްފައިވާ ހަތަރު ނޫހެއްވެސް އަލުން ނެރުމުގެ ހުއްދަ ދެއްވައިފައެވެ.
