ދުނިޔޭގެ ފުޓްބޯޅަ ޢިދުކަމަށްވާ، ފީފާ ވޯލްޑް ކަޕް 2022، ޤަތަރުގެ އަލް ޚޫރް ސިޓީގެ އަލްބައިތު ސްޓޭޑިއަމްގައި މިރޭ ފަށައިފިއެވެ.
ގާތްގަނޑަކަށް 63،000 މީހުންގެ ޖާގައިގެ ބިޔަ ރީތި ދަނޑުގައި ކުރިއަށް ގެންދިޔަ ކުލަގަދަ ހަފްލާތަކަކަށް ފަހު ހުޅުވިގެން ދިޔަ މިފަހަރުގެ ވޯލްޑް ކަޕް ހުޅުވި މެޗުގައި، މުބާރާތް ބާއްވާ ގައުމު ބައްދަލު ކުރީ، އެޓީމު ހިމެނޭ ގްރޫޕް "އޭ"ގެ އީކުއެޑޯރއާ އެވެ.
މެޗުގައި، ރަނގަޅު ކުޅުމެއް ދެއްކި އީކުއެޑޯއިން ޖެހި ދެލަނޑުވެސް ކާމިޔާބުކުރީ، ފުރަތަމަ ހާފުގައި އެޓީމުގެ ކެޕްޓަން އެނަރ ވެލެންސިއާއެވެ. އެގޮތުން އެޓީމަށް ލިބުނު ޕެނަލްޓީއަކުން ފުރަތަމަ ލަނޑު ޖެހީ މެޗުގެ 16 ވަނަ މިނިޓްގައެވެ. އަދި ދެވަނަ ލަނޑު އެނަރ ކާމިޔާބުކުރީ މެޗުގެ 31 ވަނަ މިނިޓްގައެވެ.
އޭޝިއާ ސަރަހަށްދުގައި ދެވަނަ ފަހަރަށް، އަދި މެދުއިރުމަތީގައި ފުރަތަމަ ފަހަރަށް ބާއްވާ ދުނިޔޭގެ ފުޓްބޯޅައިގެ އެންމެ ބޮޑު އީދުގައި މިއީ، ވޯލްޑް ކަޕްގެ ތާރީޚުގައި ވެސް މުބާރާތް ބާއްވާ ގައުމު، މުބާރާތް ހުޅުވި މެޗުން ބަލިވި ފުރަތަމަ ފަހަރެވެ.
ދުނިޔޭގެ ރޭންކިންގައި ޤަތަރު މިވަގުތު އޮތީ، 50 ވަނައިގައެވެ. އީކުއޭޑޯރ އޮތީ 44 ވަނައިގައެވެ. މި ގްރޫޕްގައި ދެން ހިމެނެނީ، ދުނިޔޭގެ ރޭންކިންގެ 8 ވަނައިގައި އޮތް ނެދަލޭންޑްސްއާއި 18 ވަނައިގައި އޮތް ސެނެގާލްއެވެ.
މާދަމާ ކުޅޭން ހަމަޖެހިފައިވަނީ، ގްރޫޕް "ބީ"ގައި ހިމެނޭ އިންގްލޭންޑާއި އީރާން ބައްދަލު ކުރާ މެޗާއި، ގްރޫޕް "އޭ"ގެ ނެދަލޭންޑްސް އާއި ސެނެގާލް ބައްދަލުކުރާ މެޗެވެ.
