ރާއްޖޭގެ މަޝްހޫރު ކޮންސްޓްރަކްޝަން ކުންފުޏެއް ކަމަށްވާ، ރަޝީދު ކޮންސްޓްރަކްޝަން އެންޑް ކާޕެންޓްރީ (އާރްސީސީ)ގެ ވޭނަކުން ގިނަ އަދަދެއްގެ ބަނގުރާ ފުލުހުން އަތުލައިގެންފިއެވެ.
މީސްމީޑިއާގައި ދައުރުވާ ފޮޓޯތަކަކުން ފެންނަނީ، ހުޅުމާލޭ ސަރަހައްދެއްގައި، އާރްސީސީގެ ވޭނެއް ހުއްޓުވައި އެއިން ފުލުހުން ބަނގުރަލުގެ ބާވަތެއްކަމަށްވާ ވޮޑްކާ ފުޅިތަކެއް ބާލާތަނެވެ. ނަމަވެސް މިކަމާ ގުޅޭގޮތުން ފުލުހުން އަދި ރަސްމީކޮށް މައުލޫމާތު ހާމައެއް ނުކުރެއެވެ.
އާރްސީސީއަކީ، ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު އަދި މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރައީސް ކާނަލް ރިޓަޔަރޑް މުޙައްމަދު ނާޒިމްގެ އާއިލީ ކުންފުންޏެކެވެ.
