ތަފާތު އެކި މައްސަލަތަކުގައި ފުލުހުން އަތުލައިގަނެ، ފުލުހުންގެ ބެލުމުގެ ދަށަށް ގެނެސްފައިވާ ގިނަ އަދަދެއްގެ ބަނގުރާ ނައްތާލައިފިއެވެ.
ފުލުހުން ބުނީ، މި މަހު 23 ވަނަ ދުވަހު ދޫނިދޫގައި ނައްތާލާފައިވަނީ އެކި މައްސަލަތަކުގައި ފުލުހުންގެ ބެލުމުގެދަށަށް ގެެނެސްފައިވާ ބްރޭންޑެޑް ފުޅީގެ ގޮތުގައި ހިމެނޭ 1060 ފުޅި ބަނގުރާ، ޕެޓް ފުޅީގެ ގޮތުގައި ހިމެނޭ 270 ފުޅި ބަނގުރާ، 1058 ދަޅު ބިޔަރު، 5 ލީޓަރުގެ 3 ފުޅި އަދި އެހެނިހެން ތަކެތީގެ ގޮތުގައި ހިމެނޭ 54 އައިޓަމް ކަމަށެވެ. ނައްތާލި އެހެނިހެން ތަކެތީގެތެރޭގައި ކޮތަޅު، ނޫސްކަރުދާސް، ކަރުދާސް ފޮށިގަނޑު، ދަބަސް ފަދަ ތަކެތި ހިމެނޭ ކަމަށްވެސް ފުލުހުން ބުނެއެވެ.
މި ތަކެއްޗަކީ ދިވެހި ފުލުހުންގެ ޚިދުމަތަށް ހުށަހެޅިފައިވާ ބަނގުރަލުގެ މައްސަލަތަކުގެ ތެރެއިން 2023 ވަނަ އަހަރުގެ ޖަނަވަރީ މަހުގެ ނިޔަލަށް ޑްރަގް އެންފޯސްމަންޓުގެ ބެލުމުގެ ދަށުގައި ހުރި އެވިޑެންސްތަކުގެ ތެރެއިން ކްލޯސްޑް ކުރެވިފައި ހުރި ކޭސްތަކުގައި ހިމެނޭ ބަނގުރަލާއި، މި މުއްދަތުގައި ޑްރަގް އެންފޯސްމަންޓާއި، ޓޫރިސްޓު ޕޮލިސް އަދި ހުޅުމާލެ ޕޮލިސް ސްޓޭޝަންގެ ބެލުމުގެ ދަށަށް ތުހުމަތުކުރެވޭ ފަރާތެއް ނެތްގޮތަށް ގެނެވިފައިވާ އިންސިޑެންޓް ތަކުގެ ބަނގުރަލުގެ އިތުރުން ޕީޖީ ކުރެވިފައިވާ ކޭސްތަކުގެ ތެރެއިން ނައްތާލުމުގެ ހުއްދަ ޕްރޮސެކިއުޓަރ ޖެނެރަލް ދެއްވާފައިވާ ކޭސްތަކުގައި ހިމެނޭ ބަނގުރާ ކަމަށް ފުލުހުން ބުނެއެވެ.
ބަނގުރާ ނައްތާލުން ކުރިއަށް ގެންގޮސްފައިވަނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާ ގޮތުގެ ގަވާއިދުގެ ދަށުން އެކަމަށް އެކުލަވާލި ކޮމިޓީގެ ބެލުމުގެ ދަށުން ކަމަށްވެސް ފުލުހުން ބުނެއެވެ.
