ރައީސް އިބްރާހީމް މުޙައްމަދު ޞާލިޙުގެ ސަރުކާރުން އައްޑޫ ސިޓީގައި ކުރިއަށް ގެންދާ އެންމެ ބިޔަ މަޝްރޫއުރުޢު ކަމަށްވާ ބިން ހިއްކުމުގެ މަޝްރޫޢު އަންނަ ހޮނިހިރު ދުވަހު ރަސްމީކޮށް ފަށަން ތައްޔާރުވެއްޖެއެވެ.
އައްޑޫ ސިޓީ ކައުންސިލުން ބުނީ، އައްޑޫގެ ބިމުގެ ދަތިކަމުގެ މައްސަލައަށް ހައްލު ހޯދުމަށް ކުރިއަށް ގެންދާ މި ބޮޑު މަޝްރޫއުގެ ދަށުން 193 ހެކްޓަރުގެ ބިން ހިއްކުމަށް ހަމަޖެހިފައިވާ ކަމަށެވެ.
ސިޓީކައުންލުން ބުނީ، "ޖުމްލަ 193 ހެކްޓަރުގެ ބިން ހިއްކުމަށް ހަމަޖެހިފައި ވާއިރު 11 ކިލޯމީޓަރުގެ ސަރަހައްދެއްގައި ގޮނޑުދޮށް ހިމާޔަތްކޮށް، ހިތަދޫއިން 90 ހެކްޓަރުގެ ބިން ހިއްކުމަށް ވަނީ ހަމަޖެހިފައި. މީގެ އިތުރުން މަރަދޫ އަދި މަރަދޫފޭދޫ އިން 76 ހެކްޓަރ އަދި ޓުއަރިޒަމަށް ޙާއްސަކޮށްގެން ފަޅުތެރެއިން ހިއްކައިގެން އުފައްދާ 8.3 ހެކްޓަރުގެ ތިން ރަށް ހިއްކުމަށް ވަނީ ހަމަޖެހިފައި" ކަމަށެވެ.
ނެދަލޭންޑް ވެން އޫޑް ކުންފުންޏާ ހަވާލުކޮށްގެން އިންޑިއާގެ އެގްޒިމް ބޭންކްގެ 800 މިލިއަން ޑޮލަރުގެ ކްރެޑިޓް ލައިންގެ އެހީގައި ކުރިއަށް ގެންދާ މި މަޝްރޫއު ނިމިގެންދާއިރު، މިހާރު އައްޑޫސިޓީއަށް ދިމާވެފައިވާ ބިމުގެ ދަތިކަމަށް ހައްލެއް ލިބިގެންދާނެ ކަމަށް ސިޓީ ކައުންސިލުން ބުނެއެވެ.
