ހުޅުމާލޭ ދެވަނަ ފިޔަވަހީގައި ކުރީގެ ސަރުކާރުން ތަރައްގީކުރި ހިޔާ ފްލެޓުތަކުގެ ތެރޭން ފްލެޓެއްގައި، ގަވާއިދާ ޚިލާފަށް ދެ އެޕާޓްމަންޓެއް އެއްކޮށްލުމުން، ދެ އެޕާޓްމަންޓްގެ އެއްބަސްވުން ބާތިލްކޮށް އެތަން ހުސްކުރުމަށް އާރބަންކޯއިން އެންގި އެންގުން ހުއްޓުވަން ސިވިލް ކޯޓުން އަމުރެއް ނެރެދެވޭން ނެތްކަމަށް އެ ކޯޓުން ބުނެފިއެވެ.
ހިޔާ ފްލެޓްގައި ދެ އެޕާޓްމަންޓް އެއްކޮށްލި ކަމުގެ ރިޕޯޓެއް މިދިޔަ މަހު ހުށަހެޅުމާ ގުޅިގެން އާބަންކޯއިން ވަނީ އެ މައްސަލަ ބަލައި، އެކަން ރަނގަޅު ކުރުމާއެކު ޖޫރިމަނާ ފައިސާ ދައްކާން އަމުރުކޮށްފައެވެ. އަދި އެގޮތަށް އަމަލު ނުކުރުމުން އެތަނުގެ ވެރިފަރާތް ދެ ލައްކަ ރުފިޔާއިން ޖޫރިމަނާކޮށް، 10 ދުވަހުގެ ތެރޭގައި ތަން ހުރިގޮތަށް ރުޖޫޢަކޮށް އާބަންކޯއާ ހަވާލުކުރާން ފަހުން އަމުރުކުރީއެވެ.
މިކަމާ ގުޅިގެން، މި ދެ އެޕާޓްމަންޓްގެ ވެރިފަރާތުން ވަނީ، އާބަންކޯގެ އެންގުން ހުއްޓވާން އަމުރެއް ނެރެދިނުމަސް ސިވިލްކޯޓަށް ހުށަހަޅައިފައެވެ. ނަމަވެސް ސިވިލް ކޯޓުން މި މައްސަލައިގައި ކުރި ހުކުމުގައި ބުނީ، ކަން ހިނގިގޮތާއި ހިޔާ ފްލެޓް އެއްބަސްވުމާއި އެއްމެދު އިމާރާތުގެ ގާނޫނަށް ބަލާއިރު، އެޕާޓްމަންޓު ލިބުނު ފަރާތުން ވަނީ، މި ހުރިހައި ކަމަކާ އެނގިހުރެ ޚިލާފުވެފައި ކަމަށެވެ.
