ވޯލްޑް ކަޕް 2022ގެ ގްރޫޕް "ބީ"ގެ ފުރަތަމަ މެޗުގައި މިއަދު އިނގިރޭސީންނާ އީރާން ބައްދަލުކޮށް ތަފާތު ބޮޑު ނަތީޖާއަކުން އިނގިރޭސީން މޮޅުވެއްޖެއެވެ.
ވެރިރަށް ދޯހާގައި ހުންނަ، 45،400 މީހުންގެ ޖާގައިގެ، ގަތަރުގެ ނޭޝަނަލް ސްޓޭޑިއަމް (ޚަލީފާ އިންޓަރނޭޝަނަލް ސްޓޭޑިއަމް)ގައި ކުޅުނު، މެޗުގެ ފުރަތަމަ ހާފްގައި، ދުނިޔޭގެ ރޭންކިންގެ 5 ވަނައިގައި އޮތް އިނގިރޭސީން ވަނީ 3 ލަނޑުގެ ލީޑެއް ހޯދައިފައެވެ. އެގޮތުން އެޓީމަށް ފުރަތަމަ ލަނޑު ޖަހައިދިނީ، ޖޫޑް ބެލިންގަމްއެވެ. އަދި 43 ވަނަ މިނިޓްގައި ބުކަޔޯ ސަކާ ޖެހި ލަނޑުގެ އިތުރުން ފުރަތަމަ ހާފްގެ އިތުރު ވަގުތުގެ ފުރަތަމަ މިނިޓްގައި ރަހީމް ސްޓާލިން ވަނީ އިނގިރޭސީންނަށް 3 ވަނަ ލަނޑު ކާމިޔާބުކޮށްދީފައެވެ.
ދެވަނަ ހާފްގައިވެސް ފުރަތަމަ ލަނޑު ޖެހީ އިނގިރޭސީންނެވެ. އެގޮތުން އިންގްލޭންޑްގެ 4 ވަނަ ލަނޑު މެޗުގެ 62 ވަނަ މިނިޓްގައި ޖަހައި ދިނީ، އެޓީމުގެ ދެވަނަ ލަނޑު ކާމިޔާބުކުރި ސަކާއެވެ.
ދުނިޔޭގެ ރޭންކިންގެ 20 ވަނައިގައި އޮތް އީރާންގެ ދެ ލަނޑުވެސް ޖަހައި ދިނީ އެޓީމުގެ މެހްދީ ތަރޭމީ އެވެ. އެގޮތުން ފުރަތަމަ ލަނޑު ކާމިޔާބުކުރީ 65 ވަނަ މިނިޓްގައެވެ. އަދި ދެވަނަ ލަނޑު އޭނާ ކާމިޔާބުކުރީ، ދެވަނަ ހާފްގެ އިތުރު ވަގުތުގެ 13 ވަނަ މިނިޓްގައި، އެޓީމަށް ލިބުނު ޕެނަލްޓީއަކުންނެވެ.
އިނގިރޭސީންގެ 5 ވަނަ ލަނޑު ޖެހީ، 71 ވަނަ މިނިޓްގައި މާކަސް ރޭޝްފޯޑްއެވެ. އަދި އެޓީމުގެ 6 ވަނަ ލަނޑު މެޗުގެ 90ވަނަ މިނިޓްގައި ކާމިޔާބުކުރީ ޖެކް ގްރެއިލިޝްއެވެ.
މި ގްރޫޕްގެ މެޗެއް މިރޭ މެންދަމު 12:00ގައި އޮންނާނެއެވެ. އެ މެޗުގައި ވާދަކުރާނީ، ވޭލްސްއާއި އެމެރިކާއެވެ.
