މިހާރު ގަތަރުގައި ކުރިއަށްދާ ފީފާ ވޯލްޑް ކަޕްގައި އީރާން ކުޅުނު ފުރަތަމަ މެޗު ފެށުމުގެ ގޮތުން އީރާންގެ ގައުމީ ސަލާމް ކުޅުނު ގަޑީގައި އެޓީމުގެ ކުޅުންތެރީންގެ ފަރާތުން ފެނިގެން ދިޔައީ އާދަޔާ ޚިލާފު މަންޒަރެކެވެ.
ދޯހާގެ ޚަލީފާ އިންޓަރނޭޝަނަލް ސްޓޭޑިއަމްގައި އިނގިރޭސީންނާ ދެކޮޅަށް އީރާން ކުޅުނު މެޗުގެ ކުރީން، އީރާންގެ ގައުމީ ސަލާމް ސްޓޭޑިއަމްގައި ޖެހުމުން އެޓީމުގެ ކުޅުންތެރީން ވަނީ، ގައުމީ ސަލާމް ކިޔަން ދެކޮޅު ހަދައިފައެވެ. އަދި އެގައުމުގައި މިހާރު ކުރިއަށްދާ މުޒާހަރާއާ އެއްކޮޅަށް ކުޅުންތެރީން ތިބިކަން ދެއްކުމުގެ ގޮތުން، ހުރިހާ ކުޅުންތެރީން ކޮނޑާކޮނޑު ޖައްސައި ކައިރިވެލުމަށް ފަހު، އިސްދަށަށް ޖަހައިގެން ހުރިހާ ކުޅުންތެރީން ތިބީ ގައުމީ ސަލާމް ނިމެންދެން އަނގަލައްޕައި، ތުންފަތް ބާރުކޮށްގެންނެވެ.
ކުޅުންތެރީންގެ މި ޢަމަލުގެ ސަބަބުން ކުޅުންތެރީންނާއި ކުޅުންތެރީންގެ ޢާއިލާތަކަށް މީގެ ބަދަލު އަންނާނޭގޮތް އަންދާޒާ ކޮށް ނުލެވުނު ނަމަވެސް، ގިނަ ބަޔަކު ގަބޫލުކުރާ ގޮތުން، އީރާން ގައުމީ ޓީމުގެ މި އަމަލު އެގައުމުގެ ސަރުކާރުން އެހާ ލުއިކޮށް ދޫކޮށެއް ނުލާނެއެވެ.
އީރާނުގެ ސަޕޯޓަރުން ވެސް ވަނީ، މެޗުބަލަ ދިޔައިރު، "ފްރީޑަމް ފޮރ އީރާން"، "ވިމަން، ލައިފް، ފްރީޑަމް" ފަދަ ލިޔުންތައް ލިޔެފައިވާ ބޯޑުތައް ދަނޑުގައި އުފުލައިފައެވެ.
އީރާނުގައި ކުރިއަށް ދާ މުޒާހަރާތަކަކީ، އުމުރުން 22 އަހަރުގެ ކުރުދިޝް އަންހެނެއް ކަމަށްވާ، މަހްސާ އަމީނީ، ފުލުހުންގެ ބެލުމުގެ ދަށުގައި ހުއްޓައި މަރުވުމާ ގުޅިގެން ކުރިއަށް ގެންދާ މުޒާހަރާ ތަކެކެވެ.
