ޤަތަރުގެ އައްރައްޔާން ސްޓޭޑިއަމް (އަޙްމަދު ބިން ޢަލީ ސްޓޭޑިއަމް، ޖާގަ: 40،000)ގައި މިރޭ ކުޅުނު ފީފާ ވޯލްޑް ކަޕް 2022ގެ ގްރޫޕް "ބީ"ގެ ދެވަނަ މެޗުގައި އެމެރިކާއާ ވޭސްލްސް ބައްދަލުކޮށް 1-1ގެ ނަތީޖާއަކުން މެޗު އެއްވަރު ވެއްޖެއެވެ.
ދުނިޔޭގެ ރޭންކިންގެ 16 ވަނައިގައި އޮތް އެމެރިކާއިން 19 ވަނައިގައި އޮތް ވޭލްސްއާ ދެކޮޅަށް ކުޅުނު މެޗުގެ ފުރަތަމަ ހާފްގައި އެމެރިކާގެ ޒުވާން ޓީމުން ވަނީ، މޮޅު، ހަލުއި ކުޅުމެއް ދައްކައިފައެވެ. އަދި އެޓީމުގެ ޖެހި ހަމަ އެކަނި ލަނޑު މެޗުގެ ފުރަތަމަ ހާފްގައި ކާމިޔާބުކޮށްދިނީ، ކުރީގެ މަޝްހޫރު ފުޓްބޯޅަ ތަރި އަދި ލައިބީރިއާގެ މިހާރުގެ ރައީސް ޖޯޖް ވިއާގެ ދަރިކަލުން ޓިމޮތީ ވިއާއެވެ.
އެފްރިކާގައި އުފެދުނު އެންމެ މޮޅު ކުޅުންތެރިޔާ، ޖޯޖް ވިއާ އަކީ، އޭސީ މިލާނަށާއި ޕީއެސްޖީއަށް ކުޅުނު ދުނިޔޭގެ އެންމެ މޮޅު އެއް ފޯވާޑް ކުޅުންތެރިޔާއެވެ. އޭނާ ކުޅުން ހުއްޓާލިތާ 30 އަހަރު ފަހުން އޭނާގެ ދަރިފުޅު ޓިމް ވިއާ މިވަނީ ބައްޕާފުޅުގެ ހަނދާތައް އާކޮށްދީފައެވެ. ވިއާއަށް ފްރާންސް، ލައިބީރިއާ އަދި ޖަމައިކާގެ ގައުމީ ޓީމަށް ކުޅުމުގެ ފުރުސަތު ލިބުނު ނަމަވެސް އޭނާ އިޚްތިޔާރުކުރީ އޭނާ އުފަންވި އެމެރިކާއަށް ކުޅުމަށެވެ.
ފޯރިގަދަ މެޗުގެ ފަހު ހާފްގައި، ވޭލްސްއިން ވަނީ ރަނގަޅު ބަދަލުތަކެއް ގެނެސް ކުޅުން ވަރުގަދަކޮށްފައެވެ. އެގޮތުން، ބަދަލު ކުޅުންތެރިއެއްގެ ގޮތުގައި ފެނިގެން ދިޔަ ސްޓްރައިކަރ ކީފާ މޯރގެ މޮޅު ކުޅުމާއެކު، އެމެރިކާ އަތްދަށުން ވޭލްސް ސަލާމަތްކޮށްދިނީ، އެޓީމަށް ލިބުނު ޕެނަލްޓީއަކުން 82 ވަނަ މިނިޓްފައު ކެޕްޓަން ގެރެތު ބޭލްއެވެ.
މި ނަތީޖާއާއެކު ގްރޫޕް "ބީ"ގެ އެއްވަނައިގައި މިވަގުތު އޮތީ އީރާނު އަތުން 6-2 އިންމޮޅުވެ ޕޮއިންޓް ހޯދި އިންގްލޭންޑެވެ. އަދި ޕޮއިންޓަކާއެކު ވޭލްސް ދެވަނައިގައި އަދި އެމެރިކާ ތިން ވަނައިގައި އޮތް އިރު އީރާން އޮތީ 4- ލަނޑާއެކު ގްރޫޕުގެ ފުލުގައެވެ.
