ޤަތަރުގައި މިހާރު ކުރިއަށްދާ ދުނިޔޭގެ ފުޓްބޯޅައިގެ އެންމެ ބޮޑު ޢީދު ކަމަށްވާ ފީފާ ވޯލްޑް ކަޕް2022 ހަކީ ހުރިހާ ގޮތަކުން ވެސް ފާހަގަކޮށްލެވޭ މުބާރާތެކެވެ. އޭޝިއާގެ އެންމެ މުއްސަނދި އެއް ފަސްގަނޑުގައި މިފަހަރުގެ ވޯލްޑް ކަޕް ބޭއްވޭއިރު، މިއީ މެދު އިރުމަތީގައި މި މުބާރާތް ކުޅޭ ފުރަތަމަ ފަހަރެވެ. އަދި މި އޭޝިއާ ސަރަހައްދުގައި މުބާރާތް ބާއްވާ ދެވަނަ ފަހަރެވެ.
ޤަތަރުގައި މިފަހަރުގެ މުބާރާތް ބާއްވާކަން އިއުލާނުކުރުމާ ހަމައިން ފެށިގެންވެސް އެގައުމަށް ދިޔައީ ދުނިޔޭގެ ބޮޑެތި ބާރުތަކުން ފާޑު ކިޔަމުންނެވެ. ޚާއްސަކޮށް، ހުޅަނގުގެ ބަސްވިކޭ ގައުމުތަކުންނާއި، އެމީހުންގެ ހަންފަތުރާ މީޑިއާ ތަކުން ގެންދިޔައީ ވަރަށް ބޮޑަށް ގަތަރަށް ފާޑުކިޔަމުންނެވެ. އެގޮތުން މުބާރާތް ފެށެން ކުޑަތަންވެފައި ވަނިކޮށް ޤަތަރު ސަރުކާރުން ނިންމި ބައެއް ނިންމުން ތަކަކީ، ހުޅަނގަށާއި އަދި އެމެރިކާ ފަދަ ގައުމުތަކަށްވެސް ލިބުނު ވެތް ނުކުރެވޭފަދަ ނިންމުންތަކެކެވެ. އެގޮތުން ފުޓްބޯޅަ ކުޅޭ ދަނޑުތަކުގައި އާންމުކޮށް ރާވިއްކުމާއި، ބުއިން މަނާކުރުމާއި، އަދި އެއްޖިންސުން ގުޅުން ހިންގުންފަދަ އިސްލާމް ދީނާ ޚިލާފު ފާޙިޝް ޝިއާރުތައް ފުޓްބޯޅަ ކުޅޭ ދަނޑުތަކާއި، ގަތަރުގެ ފަސްގަނޑުގައި ފާޅުކޮށް ހެދުން މަނާކުރުން ހިމެނެއެވެ.
މިކަންކަމަށް އިޝާރާތްކުރައްވައި، ރާއްޖޭގެ ކުރީގެ އިސްލާމިކް މިނިސްޓަރ، ޑރ. މުޙައްމަދު ޝަހީމް ޢަލީ ސަޢީދު ކުރެއްވި ޓްވީޓެއްގައި ވަނީ، "ވޯލްޑް ކަޕް 2022 އަކީ ފިކުރީ އިސްތިޢުމާރުގެ ނިމުމުގެ ފެށުން ކަމުގައި ވެދާނެ. ޤަޠަރަކީ މުސްލިމު ޤައުމަކަށް ވުމުން ޤަޠަރާ ދެކޮޅަށް ހުޅަނގުން ގެންގުޅެމުންދާ ނިފާޤު މުޅި ދުނިޔެއަށް ދަނީ ހާމަވަމުން." ކަމަށެވެ. އަދި "ޤަޠަރުގެ ވެރިންނާއި ރައްޔިތުންނަށް މާތް ﷲ ސާބިތުކަން މިންވަރުކުރައްވާށި. އާމިން." އޭނާ ލިޔުއްވާފައި ވެއެވެ.
