ގަތަރުގައި މިހާރު ކުރިއަށްދާ ވޯލްޑް ކަޕްގެ ގްރޫޕް "ސީ"ގެ ފުރަތަމަ މެޗުގައި ދުނިޔޭގެ ފުޓްބޯޅައިގެ އެންމެ ގަދަ އެއް ބާރުކަމަށްވާ، އާޖެންޓީނާ ބަލިކޮށް ސަޢޫދީ ޢަރަބިއްޔާ ޓީމުން ފުޓްބޯޅައިގެ މުޅިދުނިޔެ ސިއްސުވާލައިފިއެވެ.
ދުނިޔޭގެ މޮޅުކުޅުންތެރިޔާގެ މަގާމު ހަތްފަހަރަށް ހޯދާފައިވާ ފުޓްބޯޅައިގެ ރަސްގެފާނު ލިއޮނަލް މެސީގެ ކެޕްޓަންކަމުގައި އާޖެންޓީނާއިން މިއަދުގެ މެޗާ ކުރިމަތިލީ ފޮނި އުންމީދުތަކަކާއެކުއެވެ. ނަމަވެސް، އަރަބި ފަސްގަނޑުގައި ބޭއްވޭ ފުރަތަމަ ވޯލްޑް ކަޕް މުބާރާތުގައި، ސައުދީން ވަނީ، ފަހަތުން އަރައި 2-1ގެ ނަތީޖާއަކުން އާޖެންޓީނާ ބަލިކޮށްފައެވެ. އަދި މިއީ 36 މެޗަށް ފަހު އާޖެންޓީނާ މެޗަކުން ބަލިނުވެ ހިފަހައްޓަމުން އައި ބޮޅުތަކުގެ ނިމުންވެސްމެއެވެ.
އާޖެންޓީނާއަކީ މިވަގުތު ދުނިޔޭގެ ފުޓްބޯޅަ ރޭންކިންގެ 3 ވަނަގައި އޮތް ޓީމެވެ. ސައޫދީ އޮތީ މުބާރާތް ކުރިއަށްދާ ގަތަރުގެ ފަހަތުން ރޭންކިންގެ 51 ވަނައިގައެވެ.
މެޗުގެ ފުރަތަމަ ލަނޑު އާޖެންޓީނާއަށް ކާމިޔާބުކޮށްދިނީ، އެޓީމަށް ލިބުނު ޕެނަލްޓީއަކުން 10 ވަނަ މިނިޓްގައި މެސީއެވެ. އަދި މި ނަތީޖާއާއެކު ދެޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔައެވެ.
މިއަހަރުގެ ވޯލްޑް ކަޕް ފައިނަލް މެޗުވެސް ކުޅުމަށް ހަމަޖެހިފައިވާ، އައް ލުސައިލް ސްޓޭޑިއަމްގައި ކުޅިބަލަމުން ދިޔަ 88000 ސަޕޯޓަރުންގެ ކުރިމަތީގައި އާޖެންޓީނާ ޕްރެޝަރަށް ވައްޓާލައި ސައޫދީން މެޗުގެ ނަތީޖާ ހަމަހަމަކުރީ، މެޗުގެ 48 ވަނަ މިނިޓްގައެވެ. އެޓީމަށް ލަނޑު ޖަހައިދިނީ، ޞާލިޙް އަލްޝަހްރީއެވެ. އަދި، އޭގެ 5 މިނިޓް ފަހުން، ސަލީމް އަލްދުސަރީ ޖަހައިދިން ލަނޑާއެކު ސައޫދީން ވަނީ، އެޓީމަށް ދުނިޔޭގެ ފުޓްބޯޅައިގެ އެންމެ ބޮޑެތި ބާރުތައްވެސް ބަލިކުރެވިދާނޭކަން ސާބިތުކޮށްދީފައެވެ.
