ޤަތަރުގެ އެޑިއުކޭޝަން ސިޓީ ސްޓޭޑިއަމްގައި މިއަދު ކުޅުނު ވޯލްޑް ކަޕް ގްރޫޕް "ޑީ"ގެ ފުރަތަމަ މެޗުގައި ޑެންމާކާ ވާދަކޮށް އެޓީމު ލަނޑެއް ޖެހިޔަ ނުދީ، ތޫނިސްއިން މެޗު އެއްވަރުކޮށްލައިފިއެވެ.
ޔޫރޯ2020ގެ ސެމީ ފައިނަލްގައި ވާދަކުރި ޑެންމާކަށް، ތޫނިސްއާ ވާދަކުރި މެޗުގައި ރަނގަޅު ކުޅުމެއް ދެއްކި ނަމަވެސް، ތޫނިސްގެ ވަރުގަދަ ޑިފެންސް ލައިން ފޫއަޅުވާލެވޭ ގޮތެއް ނުވިއެވެ.
މެޗުގައި ދެޓީމުން ވެސް ލަނޑު ޖަހާނޭ ރަނގަޅު ފުރުސަތުތަކެއް ތަނަވަސްކޮށް، ގޯލްތެރެއަށް ބޯޅަ ފޮނުވާވެސްލިއެވެ. ނަމަވެސް، ރެފްރީގެ ނިންމުން އައީ އެއީ ލަނޑެއް ނޫންކަމަށެވެ. އަދި މެޗު ނިމިގެން ދިޔައީ ލަނޑެއް ކާމިޔާބު ނުކުރެވި، ކޮންމެ ޓީމަކަށްވެސް 1 ޕޮއިންޓާއެކު އެވެ.
މިއަދަކީ އަރަބި ފުޓްބޯޅައަށް ވަރަށް ޚާއްސަ ދުވަހެކެވެ. އެއީ، މި މެޗުގެ ކުރީން ސައުދީން ވަނީ، މެސީގެ އާޖެންޓީނާ ޓީމު ސިއްސުވާލައި، 2-1ގެ ނަތީޖާއަކުން މޮޅުވެފައެވެ. އަދި މި މެޗުގައި ތޫނިސްއިން ދެއްކި ހިތްވަރަށް ގިނަބައެއްގެ ތައުރީފް ދަނީ އޮހެމުންނެވެ.
