ވޯލްޑް ކަޕްގެ ގްރޫޕް "ސީ"ގައި ހިމެނޭ މެކްސިކޯއާއި ޕޮލެންޑް ބައްދަލުކުރި މެޗު ލަނޑެއް ނުޖެހި އެއްވަރުވެގެން ނިމިއްޖެއެވެ.
ދޯހާގެ ރަސް އަބޫ އަބޫދުގެ 974 ސްޓޭޑިއަމްގައި ކުޅުނު މި މެޗުގައި، މެކްސިކޯއިން މޮޅު ކުޅުމެއް ދެއްކި ކަމުގައި ވީ ނަމަވެސް، މެޗުގައި އެންމެ ރަނގަޅު ފުރުސަތެއް ލިބުނީ، ޕޮލޭންޑަށެވެ.
އެގޮތުން، މެޗުގެ 58 ވަނަ މިނިޓްގައި، ހެކްޓަރ މޮރީނޯ ޕޮލެންޑުގެ ތަރި ރަބާރޓް ލެވަންޑޯސްކީއަށް ކުރި ފައުލަކާ ގުޅިގެން ޕޮލެންޑަށް ޕެނަލްޓީއެއް ލިބުނެވެ. ނަމަވެސް، 3 ޕޮއިންޓް ހޯދަން ޕޮލެންޑަށް މެޗުގައި ލިބުނު އެންމެ ރީތި ފުރުސަތު ނާކާމިޔާބުކޮށްލީ މެކްސިކޯގެ ތަޖްރިބާކާރު ގޯލްކީޕަރު ގުއެލަމޯ އޮކޮއާއެވެ.
އޮކޮއާ ވަނީ ލެވަންޑޮސްކީ ފޮނުވާލި ޕެނަލްޓީ، ހުށިޔާރުކަމާއެކު މަތަކޮށްފައެވެ.
މި ނަތީޖާއާއެކު، ގްރޫޕް "ސީ"ގެ އެއްވަނައިގައި 3 ޕޮއިންޓާއެކު މިވަގުތު އޮތީ 2-1 އިން އާޖެންޓީނާ ބަލިކުރި ސައޫދީއެވެ.
މި ގްރޫޕްގެ މެޗުތައް ދެން ކުޅޭނީ އަންނަ ހޮނިހިރު ދުވަހުއެވެ. އެދުވަހު ފުރަތަމަ މެޗުގައި ކުޅޭނީ ޕޮލެންޑް ސައުދީއެވެ. އަދި ދެވަނަ މެޗުގައި މެކްސިކޯ އާޖެންޓީނާއެވެ.
މި ގްރޫޕުން މޮޅުވާ ޓީމު ވާދަކުރާން ޖެހޭނީ ގްރޫޕް "ޑީ"ގެ ދެވަނަ ޓީމާއެއެވެ. އަދި ދެވަނަ ޓީމު ވާދަކުރާން ޖެހޭނީ ގްރޫޕް "ޑީ"ގެ އެއްވަނަ ޓީމާއެވެ.
