ގަތަރުގެ އަލް ވަކްރާޙްގެ އަލް ޖަނޫބް ސްޓޭޑިއަމްގައި ރޭ ކުޅުނު ވޯލްޑް ކަޕް 2022 ގްރޫޕް "ޑީ"ގެ މެޗުގައި އޮސްޓްރޭލިއާއިން ލަނޑެއް ޖަހައި ލީޑު ނަގާފައި ވަނިކޮށް ފަހަތުން އަރައި އެންމެ ފަހުގެ ދުނިޔޭގެ ޗެމްޕިއަންސް ފްރާންސުން 4-1ގެ ނަތީޖާއަކުން މެޗު ކާމިޔާބުކޮށްފިއެވެ.
މި މެޗުގެ ފުރަތަމަ ހާފުގެ 9 ވަނަ މިނިޓްގައި ފްރާންސަށް ސިހުން ގެނުވީ، އޮސްޓްރޭލިއާގެ ކްރެއިގް ގުޑްވިން ކާމިޔާބުކުރި ލަނޑުންނެވެ. ނަމަވެސް، މަޑުމަޑުން ގޭމްތެރެއަށް ވަދެ، ފްރާންސުން ވަނީ 27 ވަނަ މިނިޓްގައި ނަތީޖާ ހަމަހަމަކޮށްފައެވެ. މިއީ، އެޑްރިއެން ރަބިއަޓް ޖަހައިދިން ލަނޑެކެވެ. ފްރާންސުން މެޗުގެ ލީޑު ނެގީ، 32 ވަނަ މިނިޓްގައި އޮލިވިއާ ޖިރޫ ޖެހި ލަނޑުންނެވެ.
ފްރާންސްގެ ފަހު ދެލަނޑު ފެނިގެން ދިޔައީ، ފަހު ހާފުގައެވެ. އެގޮތުން އެޓީމުގެ 3 ވަނަ ލަނޑު މެޗުގެ 68 ވަނަ މިނިޓްގައި ޖަހައިދިނީ ކިލިއަން އެމްބާޕޭއެވެ. އަދި 71 ވަނަ މިނިޓްގައި 4 ވަނަ ލަނޑު ޖަހައި ދިނީ ޖިރޫއެވެ. ޖިރޫގެ މި ލަނޑާއެކު އޭނާ ވަނީ، ފްރާންސް ޓީމަށް އެންމެ ގިނަ ގޯލް ޖެހުމުގެ ރެކޯޑް ހަދާފައިވާ ތިއެރީ އޮންރީގެ 51 ލަނޑުގެ ރެކޯޑާ އަރައި ހަމަކޮށްފައެވެ.
