ވޯލްޑް ކަޕް ގްރޫޕް "އެފް"ގެ ފުރަތަމަ މެޗުގައި މިއަދު، ދުނިޔޭގެ އެންމެ ފަހުގެ ރަނަރަޕް ކްރޮއޭޝިއާއާ ދެކޮޅަށް މޮރޮކޯ ކުޅުނު މެޗު ލަނޑެއް ނުޖެހި އެއްވަރު ވެއްޖެއެވެ.
އަލް ބޭތު ސްޓޭޑިއަމްގައި ކުޅުނު ފޯރިގަދަ މި މެޗުގައި، ދުނިޔޭގެ 12 ވަނައިގައި މިވަގުތު އޮތް ކްރޮއޭޝިއާއާއި 22 ވަނައިގައި އޮތް މޮރޮކޯގެ ފަރާތުންވެސް ރަނގަޅު ހަމަލާތަކެއް އުފެއްދިއެވެ. ނަމަވެސް، އެއްވެސް ޓީމަކަށް ލަނޑެއް ޖެހޭގޮތެއް ނުވިއެވެ.
މި ނަތީޖާއާއެކު، މޮރޮކޯއިން ވަނީ އެއީ ބަލިކުރާން އުނދަގޫ ޓީމެއްކަން ސާބިތުކޮށްދީފައެވެ. އެގޮތުން ވޭތުވެދިޔަ 3 އަހަރު ތެރޭ އެޓީމު އެންމެ ފަހުން ކުޅުނު 41 އެމެޗުގެ ތެރޭން ބަލިވީ އެންމެ 2 މެޗުންނެވެ.
ކްރޮއޭޝިއާއިން ވަނީ، މި މެޗާއެކު ބަލިނުވެ 7 މެޗު ހަމަކޮށްފައެވެ.
