ވޯލްޑް ކަޕް ގްރޫޕް "އީ"ގެ ދެވަނަ މެޗުގައި މިރޭ، ކޮސްޓަރިކާއާ ވާދަކޮށް، 7-0ގެ ތަފާތު ބޮޑު ނަތީޖާއަކާއެކު ސްޕޭނުން މިފަހަރުގެ ވޯލްޑް ކަޕްގައި އެޓީމު ކުޅުނު ފުރަތަމަ މެޗު ކާމިޔާބުކޮށްފިއެވެ.
ގަތަރުގެ އަލް ތުމާމާ ސްޓޭޑިއަމްގައި ކުޅުނު ފޯރިގަދަ މެޗުގައި ގިނަ ވަގުތު ބޯޅަ ގެންގުޅެ ގިނަ ހަމަލާތަކެއް އުފެއްދި ސްޕޭނުން ވަނީ ފުރަތަމަ ހާފްގައި 3 ލަނޑުގެ ލީޑެއް ނަގައިފައެވެ. ލަނޑުތައް ކާމިޔާބުކުރީ، 11 ވަނަ މިނިޓްގައި ޑެނީ އޮލްމޯ، 21 ވަނަ މިނިޓްގައި މާކޯ އެސެންސިއޯ، އަދި އެޓީމަށް ލިބުނު ޕެނަލްޓީއަކުން 31 ވަނަ މިނިޓްގައި ފެރާން ޓޮރޭޒްއެވެ.
ސްޕޭންގެ ހަތަރު ވަނަ ލަނޑުވެސް އެޓީމަށް 54 ވަނަ މިނިޓްގައި ޖަހައިދިނީ ޓޮރޭޒްއެވެ. މެޗުގެ 74 ވަނަ މިނިޓްގައި ސްޕޭންގެ 5 ވަނަ ލަނޑު ޖަހައިދިނީ، ޒުވާން މިޑްފީލްޑަރ ގަވީއެވެ. މި ލަނޑާއެކު ގަވީ ވެގެން ގޮސްފައިވަނީ ބްރެޒިލްގެ ކުރީގެ ތަރި އަދި ފުޓްބޯޅައިގެ ރަސްގެފާނުކަމަށްވާ ޕެލޭއަށް ފަހު ވޯލްޑް ކަޕްގައި މިހާތަނަށް ލަނޑުޖެހި އެންމެ ޒުވާން ކުޅުންތެރިޔާއަށެވެ. މި ލަނޑު ޖެހިއިރު އޭނާގެ އުމުރަކީ 18 އަހަރާ 110 ދުވަހެވެ.
ސްޕޭންގެ 6 ވަނަ ލަނޑު 90 ވަނަ މިނިޓްގައި ޖަހައިދިނީ ކާލޯސް ސޯލާއެވެ. އަދި 7 ވަނަ ލަނޑު 92 ވަނަ މިނިޓްގައި ޖަހައި ދިނީ އަލްވާރޯ މޮރާޓާއެވެ.
މިއީ ސްޕޭނަށް ވޯލްޑް ކަޕްގައި މިހާތަނަށް މޮޅުވެވުނު އެންމެ ތަފާތު ބޮޑު ނަތީޖާއެވެ. އަދި ވޯލްޑް ކަޕްގެ ތާރީޚުގައިވެސް 2010 ވަނަ އަހަރު ނޯތު ކޮރެއާ އަތުން 7-0އިން ޕޯޗްގަލް މޮޅުވި ފަހުން މި މުބާރާތުގައި ފެނިގެން ދިޔަ މިފަދަ ތަފާތު ބޮޑު މޮޅެވެ.
މި ނަތީޖާއާއެކު، ލަނޑުގެ ތަފާތުން 3 ޕޮއިންޓާއެކު ގްރޫޕްގެ އެއްވަނަ ސްޕޭނަށް ލިބިފައިވާއިރު، ދެވަނައިގައި ތިން ޕޮއިންޓާއެކު އޮތީ، 2-1 އިން ޖަރުމަނު ބަލިކޮށް ތާރީޚީ މޮޅެއް ހޯދި ޖަޕާނެވެ.
