އަންނަ ނޮވެމްބަރ މަހުގެ 21ގައި ފެށުމަށް ހަމަޖެހިފައިވާ ފީފާ ވޯލްޑް ކަޕް ޤަތަރު 2022ގެ އެންމެ ފަހު ދެޖާގައިގެ ތެރޭން ޖާގައެއް ކަށަވަރުކުރުމަށް ޤަތަރުގެ އަޙްމަދު ބިން ޢަލީ ސްޓޭޑިއަމް (އައްރައްޔާން ސްޓޭޑިއަމް)ގައި ރޭ ކުޅުނު އިންޓަރ ކޮންޓިނެންޓަލް ޕްލޭއޯފްގައި ޕެރޫގެ މައްޗަށް ކުރި ހޯދައި، އޮސްޓްރޭލިއާ މި މުބާރާތުން ޖާގައެއް ކަށަވަރު ކޮށްފިއެވެ.
ޕެރޫގެ ގިނަޢަދަދެއްގެ ސަޕޯޓަރުންގެ ކުރިމަތީގައި ކުޅުނު މި މެޗު އޮސްޓްރޭލިއާ ކާމިޔާބުކުރީ، މެޗުގެ ފުރިހަމަ ވަގުތު ހަމަވެ އިތުރު ވަގުތާއެކު 120 މިނިޓް ކުޅުނު އިރުވެސް ނަތީޖާއެއް ނުނެރެވުމުން، ނަތީޖާ ނެރުމަށް ޖެހި ޕެނަލްޓީ ޝޫޓްއައުޓްގައި 5-4 ލަނޑުން ކުރި ހޯދައިގެންނެވެ.
މި މެޗުގެ ހީރޯއެއްގެ ގޮތުގައި ފާހަގަވެގެން ދިޔައީ، ސީދާ ޕެނަލްޓީ ޝޫޓްއައުޓަށް ބަދަލު ކުޅުންތެރިއެއްގެ ގޮތުގައި އޮސްޓްރޭލިއާއިން ނެރުނު އެޓީމުގެ ގޯލްކީޕަރު އެންޑްރޫ ރެޑްމޭންއެވެ. ހަމަހަމަކޮށް ދިޔަ ޕެނަލްޓީ ޝޫޓްއައުޓްގައި ޕެރޫއިން ޖެހި ހަވަނަ ޕެނަލްޓީ އެލެކްސް ވަލޭރޯ ފޮނުވާލުމާއެކު ރެޑްމޭން ވަނީ ބޯޅަ މަތަކޮށް، އޮސްޓްރޭލިއާއަށް މި މުބާރާތުގެ 31 ވަނަ ޖާގަ ކަށަވަރުކޮށްދީފައެވެ.
ޤަތަރުގެ ގަދަ ހޫނުގެ ސަބަބުން، ފުރަތަމަ ފަހަރަށް ފިނިމޫސުމާ ދިމާކޮށް ބާއްވާ، ޖުމުލަ 32 ޓީމު ވާދަކުރާ މި މުބާރާތުގެ އެންމެ ފަހު ޖާގަ ކަށަވަރުކުރުމަށް، ކުޅޭ އިންޓަރ ކޮންޓިނެންޓަލް ޕްލޭއޯފްގައި މިރޭ އައްރައްޔާން ސްޓޭޑިއަމްގައި ވާދަކުރާނީ ކޮސްޓަރިކާއާއި ނިއު ޒީލޭންޑެވެ.
