ޕޯޗްގީޒް އަދި ދުނިޔޭގެ އެންމެ މޮޅު އެއް ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯއާއި އިނގިރޭސި ޕްރިމިއަރ ލީގު ކްލަބް މެންޗެސްޓަރ ޔުނައިޓެޑާ ދެމެދު ވެފައިވާ އެއްބަސްވުން ނިމުމަކަށް ގެނެސްފިއެވެ.
ޔުނައިޓެޑާއި ރޮނާލްޑޯވެސް ވަނީ، މިކަން ކަށަވަރުކޮށްދީފައެވެ. އެގޮތުން ރޮނާލްޑޯ ބުނެފައި ވަނީ، މެންޗެސްޓަރ ޔުނައިޓެޑާ އޭނާއާ ދެމެދު މަޝްވަރާ ކުރުމަށް ފަހު ދެފަރާތް ގަބޫލުވެގެން ކޮންޓްރެކްޓް ނިމުމަކަށް ގެނެސްފައިވާ ކަމަށެވެ. އަދި ޔުނައިޓެޑުންވެސް ވަނީ، އެ ކްލަބާ ރޮނާލްޑޯއާ ދެމެދު ވެފައިވާ އެއްބަސްވުން ދެފަރާތް އެއްބަސްވާގޮތުގެ މަތީން ނިމުމަކަށް ގެނެސްފައިވާ ކަމަށެވެ.
މިއީ އާ ޗެލެންޖަކާ ކުރިމަތިލާންވީ ވަގުތު ކަމަށާއި، ޔުނައިޓެޑާ ވަކިވި ނަމަވެސް، ކްލަބްގެ ސަޕޯޓަރުންނާއި އަދި ކްލަބު ދެކެ އޭނާ އަބަދުވެސް ލޯބިވާނޭ ކަމަށް ރޮނާލްޑޯ ބުންޏެވެ.
އަދި، މި ސީޒަނުގެ ބާކީ އޮތްބަޔާއި ކުރިމަގުގައިވެސް ޔުނައިޓެޑަށް ކާމިޔާބީއަށް އެދޭކަމަށް އެ ކްލަބަށް ދެފަހަރަކު ކުޅެފައިވާ، އަދި އެ މުއްދަތުގެ ތެރޭގައި 144 ލަނޑު ޖަހާފައިވާ ރޮނާލްޑޯ ބުންޏެވެ.
މިވަގުތު ރޮނާލްޑޯ ހުރީ، މިހާރު ކުރިއަށްދާ ފީވާ ވޯލްޑް ކަޕްގައި ވާދަކުރުމަށް ޕޯޗުގީޒުންގެ ގައުމީ ޓީމާއެކު، ގަތަރުގައެވެ.
