ވޯލްޑް ކަޕް ގްރޫޕް "އެފް"ގެ ދެވަނަ މެޗުގައި، ކެނެޑާއާ ވާދަކޮށް، 1-0ގެ ނަތީޖާއަކުން ބެލްޖިއަމް މޮޅުވެއްޖެއެވެ.
އަޙްމަދު ބިން ޢަލީ ސްޓޭޑިއަމްގައި ކުޅުނު ފޯރިގަދަ މެޗުގެ 10 ވަނަ މިނިޓްގައި ލިބުނު ޕެނަލްޓީއާއެކު ކެނެޑާއަށް، މެޗުގެ ލީޑުނަގަން ރަނުގެ ފުރުސަތެއް ލިބުނެއެވެ. ނަމަވެސް، އަލްފަންސޯ ޑޭވިސް ޖެހި ޕެނަލްޓީ، ބެލްޖިއަމްގެ ގޯލްކީޕަރު ތިބައު ކޯޓުއާ ދިފާއުކުރީއެވެ. ތަޖްރިބާކާރު ކުޅުންތެރިންތަކެއްގެ މައްޗަށް އެކުލެވޭ ބެލްޖިއަމްޓީމާ ދެކޮޅަށް، މެޗުގެ ފުރަތަމަ ހާފްގައި ބެލްޖިއަމް ލީޑު ނަގަންދެންވެސް ކެނެޑާގެ ފަރާތުން ހިތްވަރުގަދަ ކުޅުމެއް ފެނިގެންދިޔައެވެ.
މެޗުގައި ފެނިގެންދިޔަ ހަމައެކަނި ލަނޑު ފުރަތަމަ ހާފްގެ 44 ވަނަ މިނިޓްގައި ބެލްޖިއަމަށް ކާމިޔާބުކޮށްދިނީ، ހުނަރުވެރި ސްޓްރައިކަރ މިޓީ ބަޓްޝުއާއެވެ.
މި ނަތީޖާއާއެކު ބެލްޖިއަމަށް ވަނީ 3 ޕޮއިންޓާއެކު ގްރޫޕް "އެފް"ގެ އެއްވަނަ ލިބިފައެވެ. މިގްރޫޕްގެ ފުރަތަމަ މެޗުގައި މޮރޮކޯއާ ކްރޮއޭޝިއާ ވާދަކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ.
