ވޯލްޑް ކަޕް ގްރޫޕް "ޖީ"ގެ ފުރަތަމަ މެޗުގައި ކެމަރޫނާ ދެކޮޅަށް ވާދަކޮށް 1-0ގެ ނަތީޖާއަކުން ސްވިޒަލޭންޑު އެމެޗު ކާމިޔާބުކޮށްފިއެވެ.
އަލް ޖަނޫބު ސްޓޭޑިއަމްގައި ކުޅުނު ވާދަވެރި މެޗުގައި ފެނިގެންދިޔަ ހަމަ އެކަނި ލަނޑު ދެވަނަ ހާފް ފެށިގެން 48 ވަނަ މިނިޓްގައި ސްވިޒަލޭންޑަށް ކާމިޔާބުކޮށްދިނީ، ކެމަރޫންގެ ވެރިރަށް ޔައޮންޑޭއަށް އުފަން، ނަމަވެސް 2014 ވަނަ އަހަރު ސްވިޒަލޭންޑްގެ ރައްޔިތުކަން ލިބިފައިވާ ބްރީލް އެމްބޯލޯއެވެ.
ކެމަރޫން ކޮޅަށް މެޗުގައި ލަނޑު ޖެހިނަމަވެސް އެމްބޯލޯ އެކަން ފާހަގަކޮށް އުފާފާޅެއް ނުކުރެއެވެ. މިއީ އޭނާ ސްވިޒަލޭންޑަށް ކުޅޭ ދެވަނަ ވޯލްޑް ކަޕެވެ.
މުބާރާތުގެ ގްރޫޕް ސްޓޭޖްގެ ފުރަތަމަ މެޗުތައް ނިމުމަކަށް ދާއިރު، އެފްރިކާ ބައްރަށް ނިސްބަތްވާ، ކެމަރޫން، ތޫނިސް، ސެނެގާލް އަދި މޮރޮކޯއަށް ވެސް އަދި މި މުބާރާތުގައި ލަނޑެއް ނުޖެހެއެވެ.
