ވޯލްޑް ކަޕް ގްރޫޕް "އެޗް"ގެ ދެވަނަ މެޗުގައި ގާނާކޮޅަށް ލިބުނު ޕެނަލްޓީއަކުން ކްރިސްޓިއާނޯ ރޮނާލްޑޯ ކާމިޔާބުކުރި ރެކޯޑް ބްރޭކިން ލަނޑާއެކު 2-3ގެ ނަތީޖާއަކުން ޕޯޗްގީޒް މި މުބާރާތުގައި ކުޅުނު ފުރަތަމަ މެޗު ކާމިޔާބުކޮށްފިއެވެ.
ސްޓޭޑިއަމް 947ގައި ކުޅުނު ފޯރިގަދަ މެޗުގެ ފުރަތަމަ ހާފްގައި އެއްވެސް ޓީމަކަށް ލަނޑެއް ނުޖެހުނެއެވެ. ނަމަވެސް ދެވަނަ ހާފްގެ 65 ވަނަ މިނިޓްގައި ޕޯޗްގީޒުންނަށް ލިބުނު ޕެނަލްޓީއަލުން އެޓީމަށް ލީޑު ނަގައިދިނީ، މަޝްހޫރު ތަރި ކްރިސްޓީއާނޯ ރޮނާލްޑޯއެވެ. މިލަނޑާއެކު އޭނާ ވެގެން ގޮސްފައި ވަނީ، ވޯލްޑް ކަޕްގެ ތަފާތު 5 މުބާރާތެއްގައި (2006، 2010، 2014، 2018، 2022) ލަނޑު ޖެހި ހަމައެކަނި ކުޅުންތެރިޔާއަށެވެ.
ރޮނާލްޑޯ ލަނޑު ޖެހިތާ މާކަ ގިނައިރުތަކެއް ނުވަނީސް 73 ވަނަ މިނިޓްގައި އެންޑްރޭ އަޔޫ ވަނީ ގާނާއަށް ނަތީޖާ ހަމަހަމަކޮށްދީފައެވެ. ނަމަވެސް އޭގެ ފަސް މިނިޓް ފަހުން ޖޮއައޯ ފެލިކްސް ވަނީ ޕޯޗުގީޒުންނަށް އަނެއްކާވެސް ލީޑު ހޯދައިދީފައެވެ. އަދި 80 ވަނަ މިނިޓްގައި ރަފައެލް ލެއާއޯގެ ލަނޑާއެކު ޕޯޗުގީޒުން 3-1އަށް ލީޑު ފުޅާކުރިއެވެ. ގާނާގެ ފަހު ލަނޑު 89 ވަނަ މިނިޓްގައި ކާމިޔާބުކުރީ އޮސްމާން ބުޚާރީއެވެ.
