މިފަހަރުގެ ވޯލްޑް ކަޕްގެ އެންމެ ފޭވަރިޓް ޓީމުކަމަށްވާ ބްރެޒިލުން އެޓީމު މި މުބާރާތުގައި ވާދަކުރި ފުރަތަމަ މެޗުގައި ސާބިއާއާ ވާދަކޮށް 2-0ގެ ނަތީޖާއަކުން މޮޅުވެއްޖެއެވެ.
ލުސައިލް އައިކަނިކް ސްޓޭޑިއަމްގައި ކުޅުނު، މިމެޗުގައި، ފީފާ ރޭންކިންގެ 25 ވަނައިގައި އޮތް ސާބިއާއިން، ދުނިޔޭގެ ރޭންކިންގެ އެއްވަނައިގައި އޮތް ބްރެޒިލް ލަނޑެއް ޖެހިޔަ ނުދީ ގަޑިއެއްހާއިރު ހިފެހެއްޓިއެވެ. ނަމަވެސް ސްޓައިލްގައި ކުޅެމުން ދިޔަ ބްރެޒިލުން މެޗުގެ ލީޑު ނެގީ 62 ދެވަނަ މިނިޓްގައި ރިޗަލިސަން ޖެހި ލަނޑުންނެވެ. އަދި 73 ވަނަ މިނިޓްގައި އޭނާ ވަނީ ހިތްގައިމު ރީތި ލަނޑެއް ޖަހައި ބްރެޒިލްގެ ލީޑު ފުޅާކޮށްދީފައެވެ.
މި މެޗާއެކު މުބާރާތުގައި ވާދަކުރާ ކޮންމެ ޓީމެއްވެސް މިވަނީ، އެއްމެޗު ހަމަކޮށްފައެވެ. ގްރޫޕް "ޖީ"ގެ އެއްވަނައިގައި 3 ޕޮއިންޓާއެކު ބްރެޒިލް އޮތީ ލަނޑުގެ ތަފާތުންނެވެ. ކެމަރޫން އަތުން 1-0އިން މޮޅުވެ 3 ޕޮއިންޓާއެކު ގްރޫޕްގެ ދެވަނައިގައި އޮތީ ސްވިޓްޒަލޭންޑެވެ.
