ގަތަރުގެ އަޙްމަދު ބިން ޢަލީ ސްޓޭޑިއަމްގައި މިއަދު ކުޅުނު ވޯލްޑް ކަޕް ގްރޫޕް "ބީ"ގެ 3 ވަނަ މެޗުގެ 90 މިނިޓް ހަމަވެ އިތުރު ވަގުތުގެ ގޮތުގައި ދެއްކި 9 މިނިޓް ތެރޭ ވޭލްސް ކޮޅަށް 2 ލަނޑު ޖަހައިގެން އީރާނުން ފުރަތަމަ ފަހަރަށް ވޯލްޑް ކަޕްގައި ޔޫރަޕްގެ ޓީމެއް ބަލިކޮށްފިއެވެ.
މެޗުގައި އީރާނުގެ ފަރާތުން ގިނަ ހަމަލާތަކެއް އުފެއްދި ނަމަވެސް، އެޓީމަށް ލަނޑެއް ޖެހުނީ މެޗުގެ 90 މިނިޓް ހަމަވުމުން އިތުރު ވަގުތުގެ ގޮތުގައި ދެއްކި 9 މިނިޓް ތެރޭގައެވެ. މީގެ އިތުރުން އީރާންގެ މަހްދީ ތަރޭމީއަށް ޕެނަލްޓީ އޭރިއާގެ ބޭރުން ކުރި ފައުލަކާ ގުޅިގެން، ފަހު ހާފުގެ 86 ވަނަ މިނިޓްގައި ވޭލްސްގެ ގޯލް ކީޕަރު ވޭން ހެނެސީއަށް ވަނީ ރަތްކާޑެއް ދައްކައި ދަނޑުން ފޮނުވާލައިފައެވެ. ވޭލްސްއިން މެޗުގެ ފަހުބައި ފުރިހަމަކުރާން ޖެހުނީ 10 ކުޅުންތެރީންނާއެކުއެވެ.
އީރާނުގެ ފުރަތަމަ ލަނޑު އިތުރު ވަގުތުގެ 8 ވަނަ މިނިޓްގައި ކާމިޔާބުކޮށްދިނީ، ރޯޒްބާ ޗެޝިމީއެވެ. އަދި އޭގެ އެއް މިނިޓްފަހުން، ރާމިން ރެޒާއިއަން ވަނީ އިތުރު ލަނޑެއް ޖަހައި 2-0އަށް ނަތީޖާ ބަދަލުކޮށްލައިފައެވެ.
މި ނަތީޖާއާއެކު، އީރާން ވަނީ 2 މެޗުން ހޯދި ތިން ޕޮއިންޓާއެކު ގްރޫޕްގެ 2 ވަނައަށް ޖެހިލައިފައެވެ. 3 ޕޮއިންޓާއެކު އެ ގްރޫޕްގެ އެއްވަނައިގައި އޮތް އިނގިރޭސީން މިރޭ ނުކުންނާނީ އެމެރިކާއާ ދެކޮޅަށެވެ.
