ގަތަރުގައި މިހާރުކުރިއަށްދާ ވޯލްޑް ކަޕް ފުޓްބޯޅަ މުބާރާތުގައި ފެނިގެންދިޔަ ފުރަތަމަ ރަތްކާޑު، ވޭލްސްގެ ގޯލް ކީޕަރު ވޭން ހެނެސީއަށް ދައްކައިފިއެވެ.
ގަތަރުގެ އަޙްމަދު ބިން ޢަލީ ސްޓޭޑިއަމްގައި މިއަދު އީރާނާ ދެކޮޅަށް ވޭލްސް ކުޅުނު ވޯލްޑް ކަޕް ގްރޫޕް "ބީ"ގެ 3 ވަނަ މެޗުގައި ވޭން ހެނެސީއަށް ރަތްކާޑެއް ދެއްކީ އީރާންގެ މަހްދީ ތަރޭމީއަށް ޕެނަލްޓީ އޭރިއާގެ ބޭރުން ކުރި ފައުލަކާ ގުޅިގެންނެވެ. މި ފައުލާ ގުޅިގެން ރެފްރީ ފުރަތަމަ ހެނެސީއަށް ދެއްކީ ރީނދޫކާޑެކެވެ. ނަމަވެސް، ވީއޭއާރް ބެލުމަށް ފަހު، ރީނދޫ ކާޑް ކެންސަލްކޮށް، ރެފްރީ ވަނީ އެއީ ސީދާ ރަތްކާޑެއް ކަމަށް ނިންމައިފިއެވެ. ވޭލްސްއިން މެޗުގެ ފަހުބައި ފުރިހަމަކުރާން ޖެހުނީ 10 ކުޅުންތެރީންނާއެކުއެވެ.
ހެނެސީއަކީ، ވޯލްޑް ކަޕް މެޗެއްގައި މިގޮތަށް ރަތްކާޑު ހޯދި ތިންވަނަ ގޯލް ކީޕަރެވެ. މީގެ ކުރިން ވޯލްޑް ކަޕް މެޗެއްގައި ރަތްކާޑު ހޯދާފައި ވަނީ، 2010 ވަނަ އަހަރުގެ ވޯލްޑް ކަޕްގައި އުރުގުއޭއާ ދެކޮޅަށް ކުޅުނު މެޗެއްގައި ދެކުނު އެފްރިކާގެ ގޯލް ކީޕަރު އިތުމެލެން ކޫނޭއާއި، 1994ގެ ވޯލްޑް ކަޕްގައި ނޯވޭއާ ދެކޮޅަށް ކުޅުނު މެޗެއްގައި އިޓަލީގެ ގޯލް ކީޕަރު ޖިއާންލުކާ ޕެގްލުއިކާއަށެވެ.
