މެދުއިރުމަތީގައި ބާއްވާ ފުރަތަމަ ވޯލްޑް ކަޕް ފުޓްބޯޅަ މުބާރާތް ގަތަރުގައި ކުރިއަށް ދާއިރު، މިއަދު ސެނެގޯލްއާ ދެކޮޅަށް ކުޅުނު ގްރޫޕް "އޭ"ގެ 3 ވަނަ މެޗުން 3-1 ލަނޑުން ބަލިވެ އެ މުބާރާތުން ކެޓި ފުރަތަމަ ޓީމަށް ގަތަރުވެއްޖެއެވެ.
އަލް ޘުމާމާ ސްޓޭޑިއަމްގައި ކުޅުނު މެޗުގެ ފުރަތަމަ ހާފްގެ 33 ވަނަ މިނިޓްގައި ސެނަގޯލް ޕެނަލްޓީއޭރިޔާ ތެރޭން ގަތަރުގެ އަކްރަމް އަފީފީއަށް ސެނަގޯލްގެ އިސްމައިލާ ސާރު ކުރި ފައުލަކާ ގުޅިގެން ގަތަރުން ޕެނަލްޓީއަށް އެޕީލްކުރި ނަމަވެސް، ރެފްރީ އެންޓޯނިއޯ މެތިއު ލަހޯޒް، އެކަމަށް މާބޮޑު ޝައުގުވެރިކަމެއް ނުދިނެވެ.
މެޗުގައި ފެނިގެން ދިޔަ ފުރަތަމަ ލަނޑު 41 ވަނަ މިނިޓްގައި ސެނަގޯލްއަށް ކާމިޔާބުކޮށްދިނީ ބުލާއީ ޑިއާއެވެ. އަދި 48 ވަނަ މިނިޓްގައި ލަނޑެއް ޖަހައި ފަމަރާ ޑީދިއޫވަނީ ސެނަގޯލްގެ ލީޑް 2-0އަށް ފުޅާކޮށްފައެވެ.
ހިތްވަރާއެކު ނަތީޖާ ބަދަލުކުރުމަށް މަސައްކަތް ކުރަމުން ދިޔަ ގަތަރަށް، އުފާވެރިކަމެއް ގެނެސްދިނީ، 78 ވަނަ މިނިޓްގައި މުޙައްމަދު މުންތާރީ ޖެހި ލަނޑުންނެވެ. މިއީ ވޯލްޑް ކަޕްގައި ގަތަރު ކާމިޔާބުކުރި ފުރަތަމަ ލަނޑެވެ.
ނަތީޖާ ހަމަހަމަކުރުމަށް ގަތަރުން ކުރަމުން ދިޔަ މަސައްކަތް ފެނަށް ދިޔައީ 84 ވަނަ މިނިޓްގައި ސެނަގޯލްގެ އަހްމަދޫ ޑިއެންގ ޖެހި ލަނޑާއެކު އަނެއްކާވެސް ނަތީޖާ ފުޅާވުމުންނެވެ.
މި ނަތީޖާއާއެކު، ގަތަރު ވަނީ އެއްމެޗު ބާކީ އޮއްވައި، ޕޮއިންޓެއް ނުލިބި، މުބާރާތުން ކަޓައިފައެވެ.
