އެހެން ގައުމުތަކުގެ ސަލާމަތީ ކަންކަމާ ބެހުމުގެ ކުރީން އެމެރިކާގެ ސްކޫލްތަކާއި އަދި އެ ގައުމުގެ ރައްޔިތުންގެ ސަލާމަތީ ކަންކަން ހަރުދަނާ ކުރުމަށް އެގައުމުގެ ކުރީގެ ރައީސް ޑޮނަލްޑް ޓްރަމްޕު ވިދާޅުވެއްޖެއެވެ.
އެމެރިކާގައި އާންމުން ބަޑިގެންގުޅުން މަނާކުރުމާ ދެކޮޅަށް ބޭއްވި ކޮންފަރެންސެއްގައި ވާހަކަފުޅު ދައްކަވަމުން، ޓްރަމްޕް ވިދާޅުވީ، ދުނިޔޭގެ އެހެން ގައުމުތައް ބިނާކުރުމަށް ހޭދަކުރުމުގެ ކުރީން، އަމިއްލަ ގައުމުގެ ދަރީންނަށް ރައްކާތެރި ސްކޫލް މާހަލުތަކެއް ބިނާކުރެވެން ޖެހޭ ކަމަށެވެ.
އެގޮތުން، ޔޫކްރޭން، އިރާގު، އަފްޣާނިސްތާން ފަދަ ގައުމުތަކަށް ޓްރިލިއަނުން ފައިސާ ހޭދަކުރި ނަމަވެސް އެއިން އެއްވެސް މަންފާއެއް އާޚިރުގައި ނުލިބުނު ކަމަށެވެ.
އޭނާ، މިމޭރުމުން ވާހަކަފުޅު ދައްކާފައި ވަނީ، ރަޝާއާއި ޔޫކްރެއިން ހަނގުރާމައިގައި ލިބޭ ގެއްލުންތަކަށް އެހީވުމުގެ ނަމުގައި ޔޫކްރޭނަށް އެހީގެ ގޮތުގައި 40 ބިލިއަން ޑޮލަރު ދިނުމަށް ކޮންގްރެހުން ވޯޓް ދިނުމާ ގުޅިގެންނެވެ.
އެމެރިކާގެ ޕްރައިމަރީ ސްކޫލެއްގައި ދާދިފަހުން ހިންގި ބަޑިޖެހުމުގެ ހާދިސާއެއްގައި 18 ކުޑަކުދީންނާއި އަދި ޓީޗަރަކު ވަނީ މަރުވެފައެވެ.
ޓްރަމްޕު ވިދާޅުވީ، އެމެރިކާގެ ސްކޫލްތަކުގެ ސަލާމަތީ ކަންކަން އެއްކޮށް ބަދަލުކުރާން ޖެހޭ ކަމަށާއި، އަދި ސަލާމަތީ ބާރުތަކުން ސްކޫލްތަކުގެ ސަލާމަތީ ކަންކަން ބެލެހެއްޓުމުގައި އެހީތެރިވެދޭން ޖެހޭ ކަމަށެވެ.
