ވޯލްޑް ކަޕް ގްރޫޕް "ޑީ"ގެ ތިން މެޗުގައި ތޫނިސް އަތުން 1-0ގެ ނަތީޖާއަކުން މޮޅުވެ، އޮސްޓްރޭލިއާއިން މުބާރާތުގެ ގަދަ 16ގެ އުންމީދު އާކޮށްފިއެވެ.
އަލް ޖަނޫބު ސްޓޭޑިއަމްގައި މިއަދު ކުޅުނު ފޯރިގަދަ މެޗުގައި ފެނިގެން ދިޔަ ހަމައެކަނި ލަނޑު އޮސްޓްރޭލިއާއަށް ކާމިޔާބުކޮށްދިނީ މެޗުގެ 23 ވަނަ މިނިޓްގައި މިޝެލް ޑިއުކްސްއެވެ. މި މުބާރާތުގައި އޮސްޓްރޭލިޔާ ކުޅުނު ފުރަތަމަ މެޗުން ފްރާންސް އަތުން ވަނީ 4-1ގެ ނަތީޖާއަކުން ބަލިވެފައެވެ.
ތޫނިސް އަތުން ހޯދި ކާމިޔާބީއާއެކު މި މެޗު ވެގެން ގޮސްފައި ވަނީ، 1974ގެ ފަހުން ވޯލްޑް ކަޕް މެޗެއްގައި އޮސްޓްރޭލިއާ ކޮޅަށް ލަނޑެއް ނުވަދެ އެޓީމް މޮޅުވި ފުރަތަމަ ފަހަރަށެވެ.
މި ނަތީޖާއާއެކު އޮސްޓްރޭލިއާ ވަނީ 3 ޕޮއިންޓާއެކު ފްރާންސްގެ ފަހަތުން ގްރޫޕްގެ 2 ވަނައަށް ޖެހިލައިފައެވެ. ނަމަވެސް، މިރޭ މި ގްރޫޕްގައި ފްރާންސާ ޑެންމާކު ވާދަކުރާ މެޗުން ޑެންމާކު މޮޅުވެއްޖެ ނަމަ އޮސްޓްރޭލިއާ 3 ވަނައަށް ވެއްޓޭނެއެވެ. އަދި ގަދަ 16އަށް ދާން އެޓީމު ޖެހޭނީ ގްރޫޕް ސްޓޭޖްގައި ކުޅޭ ފަހު މެޗުން ޑެންމާކު ބަލިކުރާށެވެ.
