ވޯލްޑް ކަޕް ގްރޫޕް "ސީ"ގެ ތިން މެޗުގައި ސައޫދީ އަރަބިއްޔާއާ ވާދަކޮށް 2-0ގެ ނަތީޖާއަކުން މޮޅުވެ ޕޮލެންޑުން މުބާރާތުގެގަދަ 16އާ ގާތަށް ޖެހިލައިފިއެވެ.
ފުރަތަމަ މެޗުގައި އާޖެންޓީނާ ބަލިކޮށް ދުނިޔެ ސިއްސުވާލި ނަމަވެސް، މިއަދު ޕޮލެންޑާ ދެކޮޅަށް ކުޅެ އެފަދަ ނަތީޖާއެއް ނެރެވޭގޮތެއް ނުވިއެވެ.
އެޑިއުކޭޝަން ސިޓީ ސްޓޭޑިއަމްގައި ކުޅުނު މެޗުގެ 39 ވަނަ މިނިޓްގައި ޕިއޮޓް ޒިލިންސްކީ ވަނީ ޕޮލެންޑަށް ލީޑުނަގައިދީފައެވެ. އަދި ފުރަތަމަ ހާފްގެ އިތުރު ވަގުތުގައި ސައޫދީއަށް ނަތީޖާ ހަމަހަމަކުރާން ރަނުގެ ފުރުސަތެއް ލިބުނެވެ. ނަމަވެސް، ސައުދީ ކެޕްޓަން ސާލިމް އަލް ދޮސަރީ ފޮނުވާލި ޕެނަލްޓީ ޕޮލެންޑުގެ ކީޕަރު ޒެސްނީ ވަނީ މަތަކޮށް ބޭރަށް ފޮނުވައިލައިފައެވެ. އަދި އެބޯޅަ އަނބުރާ ލިބުނީ ސައުދީގެ މުހައްމަދު އަލް ބްރޭޚްއަށެވެ. އޭނާ ގޯލަށް އަމާޒުކޮށް ފޮނުވާލި ހަމަލާވެސް ކީޕަރުވަނީ އަތުން ޖަހައި ކޯނަރަކަށް ބޭރުކޮށްލައިފައެވެ.
ޕޮލެންޑުގެ ދެވަނަ ލަނޑު، 82 ވަނަ މިނިޓްގައި ޖަހައިދިނީ، ރޮބާޓް ލެވަންޑޯސްކީ އެވެ. މިއީ، މިހާތަނަށް އޭނާ ކުޅުނު 5 ވޯލްޑް ކަޕްގައި ކާމިޔާބުކުރެވުނު ފުރަތަމަ ލަނޑެވެ.
މި މެޗުގެ ނަތީޖާއާއެކު، ޕޮލެންޑް ވަނީ 4 ޕޮއިންޓާއެކު ގްރޫޕްގެ 1 ވަނައަށް ޖެހިލައިފައެވެ. އަދި ސައުދީން 3 ޕޮއިންޓާއެކު 2 ވަނައިގައި އޮތްއިރު، ޕޮލެންޑަށް ގަދަ 16 ކަށަވަރުކުރާން ބޭނުން ވަނީ، ގްރޫޕް ސްޓޭޖްގައި ކުޅޭ ފަހު މެޗުގައި އާޖެންޓީނާއާ ދެކޮޅަށް އެންމެ ޕޮއިންޓެކެވެ. މެކްސިކޯ ބަލިކޮށްގެން ސައޫދީއަށްވެސް ދެވަނަ ބުރަށް ދިއުމުގެ ފުރުސަތު އަދި އެބައޮތެވެ.
