ދިވެހިރާއްޖޭގެ ސިޔާސީ މައިދާނުގައި، މަސައްކަތްކުރަށްވާ ބައެއް ލީޑަރުން ބައެއްފަހަރު، ފާޅުގައި ކަންކަމާ އުޅުއްވާން ކެރިވަޑައި ނުގެން، ފަރުދާގެ ފުރަގަހުގައި ހުރެ، އަމިއްލަ ލަޝްކަރަށް ހަމަލާދޭ ވާހަކައަކީ މިހާރަކަށް އައިސް ގަދަވަމުން އަންނަ ވާހަކައެކެވެ. އެހެން ވާންޖެހެނީ ސަބަބުތަކެއްވެސް ހުރީމައެވެ. ބައެއްފަހަރު، ތިމާއަކީ ލީޑަރުނަމަވެސް، ލީޑަރެއްގެ ކޮލިޓީ ނުދެއްކުން، އަނެއްބައި ފަހަރަށް، ތިމާ އުފެއްދި ފިކުރުގެ ތެރޭން ތިމާއާ ދެކޮޅަށް އަންނަ އަޑުތައް ގަދަވުންވެސް ހިމެނެއެވެ.
މިފަހަކަށް އައިސް ރާއްޖޭގެ ސިޔާސީ މައިދާނުގައި، އެންމެ ގަދައަށް ދެކެވޭ އެއްވާހަކައަކީ، އެމްޑީޕީގެ މައި ތަނބު، އަދި ޕާޓީގެ ރައީސް މުޙައްމަދު ނަޝީދާއި، ރާއްޖޭގެ މިހާރުގެ ރައީސުލްޖުމްހޫރިއްޔާ އަދި މިވަގުތު އެމްޑީޕީގެ ލީޑަރު އިބްރާހީމް މުޙައްމަދު ޞާލިހާ ދެމެދު، ވެރިކަމުގެ ބާރުތަކާ ހެދި އޮތް އަރާރުމާއި ވާދަވެރިކަމުގެ ވާހަކައެވެ. އެމްޑީޕީ ވަނީ މި ދެ ލީޑަރުންނާއެކު ދެބައިވެފައެވެ. ނަމަވެސް، މިވަގުތު، އެމްޑީޕީ ތެރޭގައި ރައީސް ނަޝީދަށްވުރެ، ބާރުގަދަކަމަށް ފެންނަނީ ރައީސް ޞާލިޙެވެ.
ރައްޔިތުން ގަބޫލުކުރާ ގޮތުން، ރައީސް ނަޝީދަށް މިވަގުތު ފާޅުގައި ރައީސް ސާލިހާ ކުރިމަތިލައްވާން ކެރިވަޑައެއް ނުގަންނަވައެވެ. އެހެންވެ އެކަންކުރައްވަނީ، ފިލާހުންނަވައިގެންނެވެ. އެގޮތުން ގިނަ ބަޔަކު ތުހުމަތުކުރާ ގޮތުން، ޓްވިޓަރގައި މިފަހަކަށްއައިސް މާ ގަދަކޮށްލައިގެން އުޅޭ "ހަސަން ކުރުސީ" @HKurusee ޓްވިޓަރ ހެންޑްލް އަކީ ރައްޔިތުންގެ މަޖިލީހުގެ ރައީސްކަންވެސް ކުރައްވަމުން ގެންދަވާ، ރައީސް ނަޝީދުގެ "ވަގު" އެކައުންޓެކެވެ. އަދި މަޖިލީހުގައި ރައީސް ނަޝީދާ އިދިކޮޅު، އެމްޑީޕީގެ ބައެއް މެންބަރުން ވަރަށް ފާޅުގައިވެސް ޓްވިޓަރގައި މިކަން މިގޮތަށް ހިނގާކަމަށް ވިދާޅުވަމުން ގެންދަވައެވެ.
ކޮންމެއަކަސް، ހަސަންކުރުސީ ދަނީ، ޞާލިހުގެ ސަރުކާރަށާއި، އެ ސަރުކާރުގެ ބައިވެރީންނަށްވެސް ވަރަށް ބޮޑަށް ފާޑުކިޔަމުންނެވެ. އަދި ރައީސް ނަޝީދުގެ ދިފާއުގައާއި، އެމަނިކުފާނަށް ބާރުވެރިވާގޮތަށް ވެސް ގިން ވާހަކަތަކެއް ދައްކަމުންނެވެ. އެގޮތުން، މިއަދު ހަސަންކުރުސީގެ އެކައުންޓުން ކޮށްފައިވާ ޓްވީޓެއްގައި ބުނެފައިވަނީ، އަންނަ އަހަރު ގައުމު ބިނާކުރުމުގެ މަސައްކަތް ފެށޭނޭ ކަމަށާއި، އަދި މިހާރު ސަރުކާރަށް ތާޢީދުކުރާ ގިނަބަޔަކު ޖަލަށްދާންޖެހުން ގާތްކަމަށެވެ.
" ނޮވެންބަރު 2023 ގައި އާ ގައުމިއްޔަތެއް ބިނާކުރުމުގެ އަމަލީ މަސައްކަތް ފެށޭނެ، އެއްވެސް ބޭފުޅަކު އެކަމާ ޝައްކު ނުކުރައްވާ. އަޅުގަޑަށް ފެންނަ ފެނުމުގާ މިހާރު މަޖިލީހުގަ ތިއްބެވި ގިނަބޭފުޅުން ޖަލަށްދިއުމަކީ ވެސް އެކަށީގެންވާކަމެއް. އެއީ އެބޭފުޅުން އެތިބީ ކަޅުފައިސާގަ ޖެހިވަޑައިގެން." ހަސަންކުރުސީގެ ޓްވީޓުގައި ވެއެވެ.
މީގެ އިތުރުންވެސް، މިއަދު، ހަސަންކުރުސީ ވަނީ، ރައީސް ސާލިހާ ނަޝީދާ ދެބޭފުޅުންގެ ތާޢީދު އޮތްވަރު ބަލަން ޕޯލްއެއްވެސް ނަގައިފައެވެ. އަދި އޭގެ ނަތީޖާ ދައްކާގޮތުން އެމްޑީޕީ ޕްރައިމަރީއެއް ބާއްވައިފި ނަމަ، ރައީސް ނަޝީދު ފަސޭހަކަމާއެކު ކާމިޔާބުކުރައްވާނޭކަމަށް ހަސަންކުރުސީގެ ޕޯލްއިން ދައްކައެވެ. އެއީ %56 - %44ގެ ނަތީޖާއެކެވެ. ވޯޓުދީފައިވަނީ 4914އެވެ.
