ފީފާ ވޯލްޑް ކަޕް 2022ގެ ގްރޫޕް "އީ"ގެ 3 ވަނަ މެޗުގައި ޖަޕާނާ ވާދަކޮށް، 1-0ގެ ނަތީޖާއަކުން ކޮސްޓަރީކާ މޮޅުވުމުން އެގްރޫޕްގެ ކުރީގައި އޮތް ތިން ޓީމު ޕޮއިންޓުގެ ގޮތުން އެއްވަރުވެ، ހުރިހާ ޓީމުތަކަށްވެސް ދެވަނަ ބުރުގެ ފުރުސަތު ބޮޑުވެއްޖެއެވެ.
އަޙްމަދު ބިން ޢަލީ ސްޓޭޑިއަމްގައި، ކުޅުނު މެޗުގައި ޖަޕާނަށް ލިބުނު ފުރުސަތުތަކުގެ ބޭނުން ނުހިފުމުގެ ނަތީޖާއަކަށްވީ، 81 ވަނަ މިނިޓްގައި ކޮސްޓަރީކާގެ ކޭޝަރ ފުލާ ޖެހި ލަނޑާއެކު، އެ ގްރޫޕްގައި ޖަރުމަނު ފިޔަވައި ހުރިހާ ޓީމަކަށްވެސް ތިން ޕޮއިންޓު ލިބުމެވެ.
މި ގްރޫޕްގައި މިރޭ، ޖަރުމަނު ނުކުންނާނީ ފުރަތަމަ މެޗުގައި 7-0އިން ކޮސްޓާރީކާ ބަލިކޮށް 3 ޕޮއިންޓާއެކު ލަނޑުގެ ތަފާތުން ކުރީގައި އޮތް ސްޕޭނާ ދެކޮޅަށެވެ. ޖަރުމަނަށް އަދި ޕޮއިންޓެއް ނުލިބެއެވެ.
