ފީފާ ވޯލްޑް ކަޕް 2022ގެ ގްރޫޕް "އެފް"ގެ 4 ވަނަ މެޗު ފެތަނާހެން މިރޭ ކެނެޑާ ލަނޑެއްޖަހައި ލީޑު ނަގާފައިވަނިކޮށް، ފަހަތުން އަރައި ކްރޮއޭޝިއާ 4 ލަނޑުޖަހައި ކެނެޑާ މުބާރާތުން ބޭރުކޮށްލައިފިއެވެ.
ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު މެޗުގެ 2 ވަނަ މިނިޓްގައި ކެނެޑާގެ އަލްފަންސޯ ޑޭވީސް ވަނީ އެޓީމަށް ލީޑުނަގައިދީފައެވެ. މިއީ މިހާތަނަށް ފަސްފަހަރު ވޯލްޑް ކަޕްގައި ވާދަކުރި ކެނެޑާއަށް ވޯލްޑް ކަޕެއްގައި ކާމިޔާބުކުރެވުނު ފުރަތަމަ ލަނޑެވެ. އަދި ވޯލްޑް ކަޕްގައި މިހާތަނަށް އެންމެ އަވަހަށް ކާމިޔާބުކުރި ލަނޑެވެ.
ފުރަތަމަ ހާފް ނިމުމުގެ ކުރީން ކްރޮއޭޝިއާއިން ވަނީ މެޗުގެ ލީޑު އަނބުރާލައިފައެވެ. އެގޮތުން 36 ވަނަ މިނިޓްގައި އެޓީމަށް ނަތީޖާ ހަމަހަމަކޮށްދިން ލަނޑު ޖަހައިދިނީ، އަންދްރޭ ކްރަމަރިޗެވެ. އަދި 44 ވަނަ މިނިޓްގައި މާކޯ ލިވާޖާ ޖެހިލަނޑާއެ ލީޑުލިބުނެވެ.
ދެވަނަ ހާފު ފަށައިގެން 70 ވަނަ މިނިޓްގައި ކްރޮއޭޝިއާގެ ތިން ވަނަ ލަނޑުވެސް ޖަހައިދިނީ އަންދްރޭ ކްރަމަރިޗެވެ. އަދި އެޓީމުގެ 4 ވަނަ ލަނޑު އިތުރު ވަގުތުގެ 4 ވަނަ މިނިޓްގައި ޖަހައިދިނީ ބަދަލުކުޅުންތެރިއެއްގެ ގޮތުގައި ކުޅެންއެރި ލޮވްރޯ މާޔަރެވެ.
މި ނަތީޖާއާއެކު، ކެނެޑާއަށް މުބާރާތުގެ ދެވަނަ ބުރު ގެއްލިފައިވާއިރު، ކްރޮއޭޝިއާ ވަނީ 4 ޕޮއިންޓް ފައިދާ 3 ގޯލާއެކު ގްރޫޕްގެ އެއްވަނައަށް ޖެހިލައިފައެވެ. 3 ޕޮއިންޓް ފައދާ 2 ގޯލާއެކު ދެވަނައިގައި އޮތީ، ބެލްޖިއަމްއަތުން 2-0އިން މޮޅުވި މޮރޮކޯއެވެ. ބެލްޖިއަމް 3 ވަނައިގައި އޮތީ 3 ޕޮއިންޓާއެކުއެވެ.
ގްރޫޕްގެ ފަހު މެޗުތަކުގައި، ކްރޮއޭޝިއާ ނުކުންނާނީ ބެލްޖިއަމާ ދެކޮޅަށެވެ. ކެނެޑާ ނުކުންނާނީ މޮރޮކޯއާ ދެކޮޅަށެވެ.
