ތުރުކީގެ ނަން ތުރުކިޔޭއަށް ބަދަލުކޮށް، އެގައުމުން އެކަން އިއުލާނުކޮށްފިއެވެ.
މެދުއިރުމައްޗަށް ނިސްބަތްވާ، ތުރުކީގެ ރަސްމީ ނަމެއްގެ ގޮތުގައި "ދަ ރިޕަބްލިކް އޮފް ތުރުކިޔޭ"އަށް ހަމަޖައްސައި އެގައުމުން މިހާރު ވަނީ އެކަން އދ. އަށާއި، ދުނިޔޭގެ އެފަދަ އެހެނިހެން ޖަމިއްޔާތަކަށްވެސް ރަސްމީކޮށް އަންގައިފައެވެ.
ތުރުކީގެ ޚާރިޖީ ވަޒީރު ވިދާޅުވީ، އެގައުމުގެ ބްރޭންޑް ވެލިއު އިތުރުކުރުމަށް ރައީސް ރަޖަބް ޠައްޔިބު އުރުދުޣާން ފެއްޓެވި މަސައްކަތް ކާމިޔާބުކަމާއެކު ނިމުމަކަށް ގެންނާން ޖެހޭ ކަމަށެވެ.
ފާއިތުވީ އަހަރުގެ ޑިސެމްބަރު މަހުގެ ތެރޭގައި، އުރުދުޣާން ނެރުއްވި ޤަރާރެއްގައި ބުނެފައި ވަނީ، ބައިނަލްއަގްވާމީ ގޮތުން ބަލައިގަނެފައިވާ ތުރުކީގެ ނަން "ތުރުކިޔޭ"އަށް ބަދަލުކުރުމަށާއި، އަދި ތުރުކީން އުފައްދާ މުދަލުގައިވެސް "ތުރުކިޔޭގެ އުފެއްދުމެއް" މިގޮތަށް ބޭނުންކުރުމަށް އެދިވަޑައިގެންފައެވެ.
