ފީފާ ވޯލްޑް ކަޕް 2022ގެ ގްރޫޕް "ޖީ"ގެ 3 ވަނަ މެޗުގައި ސާބިއާ 2 ލަނޑުގެ ލީޑެއްގައި އޮއްވައި ފަހަތުން އަރައި ކެމަރޫން 3-3ގެ ނަތީޖާއަކުން މެޗު އެއްވަރުކޮށްފިއެވެ.
އަލް ވަކްރާގެ އަލް ޖަނޫބު ސްޓޭޑިއަމްގައި ކުޅުނު ފޯރިގަދަ މެޗުގެ ފުރަތަމަ ލަނޑު ޖަހައި ލީޑު ނެގީ ކެމަރޫނެވެ. 29 ވަނަ މިނިޓްގައި ޖީން-ޗާލްސް ކަސްޓެލެޓޯ ޖަހައިދިން ލަނޑާއެކު، ފުރަތަމަ ހާފް ނިމެން ދަނިކޮށް، ސާބިއާއިން މެޗުގެ ލީޑު ނެގީ ފުރަތަމަ ހާފްގެ އިތުރު ވަގުތުގެ ތެރޭގައި ދެ ލަނޑު ޖަހައިގެންނެވެ. ފުރަތަމަ ލަނޑު 45+1 ވަނަ މިނިޓްގައި ސްޓްރަހިންޔާ ޕެވްލޮވިޗް ކާމިޔާބުކޮށްދިން އިރު، ދެވަނަ ލަނޑު 45+3 ވަނަ މިނިޓްގައި ޖަހައިދިނީ ސަރްގީ މިލިންކޮވިޗް-ސެވިޗެވެ.
ސާބިއާގެ ލީޑު ފުޅާކުރި ލަނޑު 53 ވަނަ މިނިޓްގައި ކާމިޔާބުކުރީ މިޓްރޮވިޗެވެ. ނަމަވެސް، ކެމަރޫނުން ބަދަލު ކުޅުންތެރިއެއްގެ ގޮތުގައި ކުޅެން އެރި ވިންސެންޓް އަބޫބަކުރު 63 ވަނަ މިނިޓްގައި ލަނޑު ޖެހިތާ 3 މިނިޓްތެރޭ ކެމަރޫންގެ އެރިކް މެކްސިމް ޗޫޕޯ-މޮޓިން ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ.
މި ނަތީޖާގެ ސަބަބުން، މިދެޓީމަށްވެސް ގްރޫޕްގައި މިހާތަނަށް ކުޅުނު 2 މެޗުން ޕޮއިންޓެއް ލިބިފައިވާއިރު، ގަދަ 16 އަށް ދިއުމަށް ސާބިއާ ޖެހޭނީ ފަހު މެޗުގައި ސްވިޒަލޭންޑް ބަލިކުރާށެވެ. އަދި ކެމަރޫން ޖެހޭނީ ބްރެޒިލް ބަލިކުރާށެވެ. ސްވިޒަލޭންޑާ ބްރެޒިލް މިރޭ ކުޅޭއިރު މިއިން ކޮންމެ ޓީމަކަށްވަނީ 4 ޕޮއިންޓް ލިބިފައެވެ.
