ފީފާ ވޯލްޑް ކަޕް 2022ގެ ގްރޫޕް "ޖީ"ގެ 4 ވަނަ މެޗުގައި 1-0ން ސްވިޓްޒަލޭންޑް ބަލިކޮށް ބްރެޒިލް މި މުބާރާތުގެ ގަދަ 16ގެ ޖާގައެއް ކަށަވަރުކޮށްފިއެވެ.
ސްޓޭޑިއަމް974ގައި ކުޅުނު ފޯރިގަދަ މެޗުގައި ފެނިގެންދިޔަ ހަމަ އެކަނި ލަނޑު، 83 ވަނަ މިނިޓްގައި ބްރެޒިލަށް ޖަހައިދިނީ ކާލޮސް ހެންރީކް ކަސެމިރޯއެވެ.
މި ނަތީޖާއާއެކު، ބްރެޒިލަށް ކުޅުނު ދެ މެޗުން 6 ޕޮއިންޓް ލިބިފައިވާއިރު، ދެމެޗުން 3 ޕޮއިންޓް ލިބިގެން ސްވިޓްޒަލޭންޑް އޮތީ 2 ވަނައިގައެވެ. އަދި ގްރޫޕްގެ 3، 4ގައި އޮތް ކެމަރޫނާއި ސާބިއާއަށް ލިބިފައިވަނީ އެންމެ ޕޮއިންޓެވެ. މި ދެޓީމަށްވެސް އަދި ފުރުސަތެއް ނުގެއްލެއެވެ. ސާބިއާ ޖެހޭނީ ފަހު މެޗުގައި ސްވިޒަލޭންޑް ބަލިކުރާށެވެ. އަދި ކެމަރޫން ޖެހޭނީ ބްރެޒިލް ބަލިކުރާށެވެ.
