ފީފާ ވޯލްޑް ކަޕް 2022ގެ ގްރޫޕް "އޭ"ގައި ނެދަލޭންޑްސް ކުޅުނު ފަހު މެޗުން ގަތަރު އަތުން 2-0 ލަނޑުން މޮޅުވެ، ގްރޫޕްގެ އެއްވަނަ ޓީމުގެ ގޮތުގައި ނެދަލޭންޑްސް މި މުބާރާތުގެ ގަދަ 16ގެ ޖާގައެއް ކަށަވަރުކޮށްފިއެވެ.
އަލް ބައިތު ސްޓޭޑިއަމްގައި ކުޅުނު ފޯރިގަދަ މެޗުގައި ނެދަލޭންޑުން ކާމިޔާބުކުރި ފުރަތަމަ ގޯލް ފެނިގެން ދިޔައީ ފުރަތަމަ ހާފްގައެވެ. އެލަނޑު 26 ވަނަ މިނިޓްގައި ޖަހައިދިނީ ކޮޑީ ގެކްޕޯއެވެ. މިއީ އޭނާ މި ފަހަރުގެ ވޯލްޑް ކަޕްގައި ޖެހި 3 ވަނަ ލަނޑެވެ. އަދި ދެވަނަ ހާފް ފެށިތާ ކުޑައިރުކޮޅެއް ފަހުން، އެޓީމުގެ ދެވަނަ ލަނޑު 49 ވަނަ މިނިޓްގައި ކާމިޔާބުކުރީ ފްރޭންކީ ޑި ޖޯންއެވެ.
މި ނަތީޖާއާއެކު ކުޅުނު 3 މެޗުން 7 ޕޮއިންޓް ލިބިގެން ގްރޫޕް "އޭ"ގެ 1 ވަނަ ލިބުނު ނެދަލޭންޑްސް ގަދަ 16ގައި ވާދަކުރާން ޖެހޭނީ، ގްރޫޕް "ބީ"ގެ 2 ވަނަ ހޯދި އެމެރިކާއާ ދެކޮޅަށެވެ.
