ފީފާ ވޯލްޑް ކަޕް 2022ގެ ގްރޫޕް "އޭ"ގައި ސެނަގޯލް ކުޅުނު ފަހު މެޗުން އީކުއޭޑޯއަތުން 2-1 މޮޅުވެ ސެނަގޯލް މި މުބާރާތުގެ ގަދަ 16ގެ ޖާގައެއް ކަށަވަރުކޮށްފިއެވެ.
ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު ފޯރިގަދަ މެޗުގެ ލީޑު ސެނަގޯލަށް ހޯދައިދިނީ ފުރަތަމަ ހާފް ނިމެންދަނިކޮށް އެޓީމަށް ލިބުނު ޕެނަލްޓީއަކުން، 44 ވަނަ މިނިޓްގައި އިސްމައީލާ ސާރއެވެ. ދެވަނަ ހާފް ފަށައިގެން 67 ވަނަ މިނިޓްގައި މޮއިސެސް ސެއިސޭޑޯ ޖެހި ލަނޑުން އީކުއެޑޯ މެޗުގެ ނަތީޖާ ހަމަހަމަކުރިއެވެ. ނަމަވެސް، 70 ވަނަ މިނިޓްގައި ޕްރިމިއަރލީގުގެ ޗެލްސީއަށް ކުޅޭ ކަލިދޫ ކޮލިބަލީ ވަނީ ލަނޑެއް ޖަހައި ސެނަގޯލަށް ވޯލްޑް ކަޕްގެ ދެވަނަ ބުރު ކަށަވަރުކޮށްދީފައެވެ.
މި ނަތީޖާއާއެކު ކުޅުނު 3 މެޗުން 6 ޕޮއިންޓް ލިބިގެން ގްރޫޕް "އޭ"ގެ 2 ވަނަ ލިބުނު ސެނަގޯލަށް ގަދަ 16ގައި ވާދަކުރާން ޖެހޭނީ، ގްރޫޕް "ބީ"ގެ އެއްވަނަ ހޯދި އިންގްލޭންޑާއެވެ.
